Radio Romania International

Arhiva :

Fărtună tu Egiptu
(2011-01-31)
Atea dit soni aspuneari: 2011-02-01 13:32 EET Print
Easti 2011 un 1989 a lumil’ei arabi? – s-ntreabă comentatorl’ii politiţ, ţi minduescu câ easti unâ analoghie anamisa di mintireaşili politiţi di tora dit nordul ali Africă şi cădearea dalgâ dupu dalgâ, aoa şi dauă dechenii, a regimurlor comunisti est-europeani. Toradioarâ, analoghia lucreadzâ maş tu aţea ţi mutreaşti tindearea a lângoaril’ei ali aşi-spusâ revoluţii ali iasomie dit Tunisia, iu ndauâ dzâli di protesti arăsturnarâ unâ puteari ţi avea armasâ pi scamnu 23 di an’i. Aprâftâsita a tunisien’ilor deairâ idhee şi curayiu a mulţâlor niifharistusiţ, cari, di Maroc până tu Yemen, işirâ pit căl’iuri câţe numata li strâxescu regimurli ţi suntu di kiro, ţi calcâ nomurli şi cu aruşfeti dit vâsiliili a lor. Demografic, politic şi geopolitic, Egiptul easti nai ma di simasie dit aesti vâsilii, iara protestili-maraton di Cairo agiumsirâ tu menga la tut mapamondul. Dzâli ş-nopţâ arada, dzăţ di n’il’i di oamin’i armasirâ tru tentrul a căsăbălui tra s-caftâ dimisia a prezidentului Hosni Mubarak, ţi easti la puteari dit 1981. Cu prezenţa ş-cu puteari, forţili di represiuni vâtâmarâ icâ pliguirâ suti di oamin’i şi ncljisirâ nica şi alti n’il’i. Deapoa alti n’il’i di hâpsinatiţ, ma, işirâ dit zândăn’ili alâsati niavigl’iati di gardien’il’i cari numata au pisti tu misiunea a lor. Un di bannerlu spusi ti videari di demonstranţâ ciuduseaşti, di altâ parti şi ascherea ţi easti tu catastisea „ta s-aleagă anamisa di Eghiptu şi Mubarak". Ma multu, nkisitâ unâ ş-unâ şi dizvârtitâ până tora ca tu hauâ, revolta s-pari câ ş-aleapsi nica şi un lider, aleptu di opoziţie ta s-aibâ pâzârâpseri cu autorităţli. Fostu prezidentu ali Aghenţie Internaţionalâ tră Energhie Atomică şi laureat a Premiului Nobel tră Irini, Mohamed el-Baradei tâxi a eghiptean’ilor unâ altâ turlie di puteari şi l’i-căftă al Mubarak ta ş-da demisia „Minduescu că easti multu limbid tră tută lumea dit Egiptu că Mubarak lipseaşti ta s-fugâ. Yinitoarea jgl’ioatâ easti adrarea a unui guvernu di uniuni naţională, deapoa lipseaşti s-hibâ ndreaptâ calea tra unâ nauă constituţie şi tră alidzeri libiri.” Cu pâltârli câtâ mur, şeflu a statului canda easti hâzâri ti compromisuri cari s-nu-l’i bagâ tu piricl’iu ipotisea. El alâxi guvernul şi-l’i căftă a năului premier s-aducâ tru prota thesi democraţia, s-aducâ diznău pistipsearea şi sâ s-alumtâ cu aruşfetea. Partener strateghic a Egiptului, a curi-l’i da asistenţă militară di 1,3 miliardi di dolari tru an, Washingtonul cilăstăseaşti ta să u ţănă ziya anamisa di democraţie şi aţea ti stabilitate tu Cairo. Secretarlu american di stat, Hillary Clinton : „Pitriţem un mesaj multu limbid tu ligătură cu minduita a Statilor Unite. Noi vrem unâ tranziţie responsabilă cătâ un guvernu democratic, reformi economiţi, dimi tamam aţea ţi vor protestatarl’ii. Tru idyiul kiro, vrem s-pricunuştem că Eghiptul fu partenerlu a nostru tu proţeslu di irini cari li ţânu lucârli tu mânâ ta s-nu nkiseascâ un nău polim tu regiune chiro di 30 di an’i ş-cama.” (31.01.2011) Textul: Bogdan Matei Armâneaşti: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International