| Evenimenti europeani, București |
| (2008-02-05) |
| Atea dit soni aspuneari: 2008-02-14 12:40 EET |
Dupâ unâ lungâ vacanțâ di iarnâ, parlamentarli români ahurhirâ aieri, naua sesiuni cu mari silâ. Prota furâ amfitrionii a prezidentului ali Franțâ, Nicolas Sarkozy, cari lâ zburâ tu plen ș-li tâxi câ, tu semestrul idenție francezâ a UE, Parislu va s-asiguripseascâ ali Românie unâ ma bunâ vizibilitati europeanâ. Furâ dapoia ratificati tu cvasiunanimitati, Tratatlu di Lisabona, documentu fundamental cari alâxeaști proiectul ți s-dusi chirutu ti Constituția Europeanâ, niaprucheatu di cetățenili francezi ș-olandezi pritu referendumurili ditu 2005. Prezidentul a Camerălei a Deputațlor, Bogdan Olteanu, dzâsi câ ași acâchiseaști Bucureștiul s-u toarnâ buneața ali Franțâ ndruparea ți liu deadi ninti di aderari. Cu 387 di voturi tră, maș unu contra ș-unâ abțâneari, deputațli și senatorli facu ditu România, dupa Ungaria, Slovenia ș-Malta, patra vâsilie, di ațeali 27 membri, cari ratificâ aestu tratat ti cari lumea ari umuti că va s-agiutâ s-lucreadzâ ma ghini Uniunea extinsâ. Eara importantu ca România, aprucheatâ tu 1 di yinaru 2007, s-hibâ anamisa di protili stati cari ândrupăscu unâ Uniuni sânâtoasâ ș-dinamicâ dzâsi premierlu liberal Călin Popescu Tăriceanu, cari adâvgă: "Putem sâ spunemu că easti protlu tratat european pi cari România își bagâ efectiv vula, uidusitu cu interesili a lei, ș-nu mata veadi zori s-aproachi ți apufusirâ alțâ". Ditu opoziție, liderlu social-democrat, Mircea Geoanâ, s-duchi obligat s-aducâ aminti :"Proiectul european nu easti proiectul a unui singur partid, nu easti proiectul a unui singur guvernu, proiectul european nu easti proiectul a unui singur prezidentu, easti un proiectu național". Nica și șeflu a populiștilor ditu PRM, senatorlu Corneiu Vadim Tudor, zburâ retoric, a ipoteticțlor euro-scheptiț ditu salâ: "Aveț voi alti soluții la problemili ali vâsilie!? Sigura că nu aveț". Senatorlu UDMR (la co-guvernare) Gyorgy Frunda s-hiritisi singuru prota ș-prota câțe: "Avigliarea a minoritățlor naționali, a persoanilor cari țânu di minoritățili naționali easti pruvidzută tu Tratatlu di Lisabona, tu protlu articol". Dupâ ratificari, prezidentul ali Comisie Europeanâ, Jose Manuel Barosso, u hiritisi ântr-oarâ România și și spusi nădia câ ș-alanțâ 23 di membri va s-lia exemplul a proțlor patru, ași câ Tratatlu s-poatâ s- intrâ pi lucru tu 1 di yinaru 2009.
Autor: Bogdan Matei
Armânipsearea: Irina Paris
|
2025-04-03
Print
Puteț s-avdzâț căndțido