| UN SISTEM BANCAR DINAMIC |
| (2008-01-29) |
| Atea dit soni aspuneari: 2008-01-29 13:24 EET |
5,9 miliuni di români, dimi vâra 33% ditu populația ali vâsilie, suntu âmprumutaț la bănchi. Di aești, ma multu di 350 di nili figurează la Biroul di Credit pi lista a ațiloru ți nu pâltescu. Ș-numirlu a loru poati s-creascâ, tu condițiili tu cari criștearrea euro andicra di moneda naționalâ, leulu, dusi la criștearea a ratilor di cafi mesu cu ma multu di 15% tu meșli ditu soni ti creditili tu moneda europeanâ. Cu tuti aesti, câțe alagâ s-amintâ muștiradz, bănchili nu mata ascultâ niți urnimiili a bancâlei chentralâ, cari caftâ multă atenție tu politica di creditari, niți di statistițli oficiali mutrinda restanțierli. Ma multu di ahântu, cum bagâ oarâ jurnalu GANDUL, iși tu migdani un no productu bancar, creditlu ti ațeli ți nu pâltescu tu chiro. La prota videari s-pari câ easti unâ mari ifculie: banca caftâ puțâni documenti, unâ carti di lucru icâ unu cuponu di pensie, unu amintatic pi mesu câtu giumitati ditu minimul pi economie și țiva altu. Ama cându s-adavgâ comisioanili și taxeli di dare, toclu anual efectiv poati sâ s-aproachi di 45-50%. Jurnalu GANDUL tipuseaști zboarăli a purtâtorlui di zboru ali Bancâ Naționalâ ali României, Mugur Șteț, cari declară câ dețizia s-da icâ nu crediti a persoanilor ți suntu tu baza di dati a Biroului di Credit țâni di cafi unâ bancâ. Singura condiție easti ca instituțiili bancari sâ-și ândreagâ provizioani uidusiti, dimi fonduri cari s-anvâleascâ riscurli ligati di nipâltearea tu chiro a borgiloru a debitorlor. S-pari câ bănchili cari acționeazâ tu România nu para au frixi di htări piricliuri , câțe, nai putânu pânâ tora lucurlu lâ imnă ghini. Tu 2007 activili totali ditu sistem au ânreghistratâ unâ crișteari di 45%, tricânda di echivalentul a 75 di miliardi di euro. Tutu anu, bănchili feațirâ un profit echivalentu cu 882 di miliuni di euro, pi crișteari cu 27% andicra di amintaticurli ditu 2006. Ma multu di giumitati di aestu amintaticu fu ali BRD - Groupe Societe Generale ș-a Bancâlei Comercialâ Românâ. Lipseaști sâ spunemu ș-câ numirlu di lucrâtori ditu sistem criscu cu ma multu di 7.500, tricânda di 65.000 di lucrâtorii ș-câ valoarea a creditilor imobiliari și ipotecari dati ali populație s-feați diplo anu, lucru ți dusi la criștearea cu 80% a împrumuturlor totali dati a persoanilor fiziți. Soldul a creditilor ipotecari ș-imobiliari dati tu 2007 tricu di 4,5 miliardi euro. Și âmprumuturili di consum ânreghistrarâ anu unâ crișteari di vârâ 80%. Ași, ațeli aproapea 6 miliuni di români ti cari spuneamu ca au loatâ crediti di la bănchi, suntu borgi cu echivalentul a ma multu di 20 miliardi di euro. Partea slabâ easti câ ma multu di giumitati di aesti crediti furâ contractati tu valuta xeanâ, iara câdearea accentuatâ a cursului a leului, di cari aduțeamu aminti tu ahurhitâ feați s-creascâ ca baia ratili ti rambursarie.
Autor: Mihai Rădulescu
Armânipsearea: Irina Paris
|
2025-04-03
Print
Puteț s-avdzâț căndțido