| Priorităț românești la UE |
| (2007-12-13) |
| Atea dit soni aspuneari: 2007-12-13 14:13 EET |
Ahurhitâ di cali ti proțli alepțâ ș-ali României tu Parlamentul European, validaț Strasbourg, iu, pân di 13 di andreu, s-tâni ațea ditu soni sesiuni plenarâ di anlu aestu. Nai ma multu amintarâ popularii europeni dupu yinearea a ațiloru 35 di eurodeputaț desemnaț di români, la 25 di brumaru. Cu 13 di mandati amintati di Partidlu Democrat (ditu opoziție, pro-prezidențial) ș- 3 di la Partidlu Liberal Democrat (disfaptu ditu PNL di guvernâmintu), la cari s-avgâ 2 di la UDMR (la co-guvernari) ș-ațelu a independentului Laszlo Tokes, pareia a Partidului Popular European Democrațli Europeni (PPE-DE) ș-u nvârtușeadzâ poziția majoritarâ tu leghislativlu comunitar. Grupul Socialistu amintă ditu Romania 10 eurodeputaț, ți yinu di la prințipalul partid di opoziție PSD -, ș-ațeli 6 reprezentanțâ a Partidlui Național Liberal intrarâ tu pareia Alianța a Liberalilor ș- Democrațlor ti Europa (ALDE). Mandatlu a actualilor eurodeputaț români va s-hibâ șcurtu, di maș unu anu ș-giumitati, ama ahurheaști ninti di unu momentu istoric, va sâ s-facâ tu 13 di andreu, Lisabona simnarea a Tratatlui di reformâ ali Uniunii Europeanâ, dupu cari yini Consiliul European di vineri. Ti ndridzearea a aiștor evenimenti, niercuri, deputațli europeni, hiinda prezențâ reprezentanțâli ali Comisie Europeanâ, va s-azburascâ ti subiectili cari va s-hibâ mutriti la summitlu a șefaniloru di stat ș-di guvernu comunitari, și, tutu tu idyea dzuuâ, prezidentul a Parlamentului European, Hans-Gert Pöttering, prezidentul ali Comisie Europeanâ, José Manuel Durao Barroso, și prezidentul tu exercițiu a Consiliului European, premierlu portughez José Sócrates, va u simneadzâ semna Carta a Ândrepturlor Fundamentali - documentu ți easti parti integrantâ a noului Tratat ali Uniunii Europeanâ. Sesiunea di tora a Parlamentului European va s-aducâ ș-votlu final ti bugetlu ali Uniunii Europeanâ ti anlu 2008. Contribuția ali Românie va s-hibâ di 4,2 miliardi di lei (vârâ 1,2 miliardi di euro), ațea ți reprezintâ vârâ 1,13% ditu bugetlu comunitar și, tu idyiul chiro, vârâ 0,96% ditu produslu internu brut ali Românie. La Consiliul European, România va s-pripunâ sâ s-facâ unâ acâchiseari ca forța di lucru ditu Ripublica Moldova (ma ninti-sovieticâ, majoritar românofonâ) s- aibâ acțes tu spațiul comunitar, idyea cu românili. Oficiali di București luyursescu câ acâchisearea si justificâ pritu ațea câ, pi di unâ parti, Ripublica Moldova easti vâsilia viținâ ali Uniunii, ș-pi di altâ parti, statili europeani s-alumtâ cu unâ xichi di forțâ di lucru ma mari di 20 miliuni di lucrâtori.
Autor : Corina Cristea
Armânipsearea : Irina Paris
|
2025-04-03
Print
Puteț s-avdzâț căndțido