Radio Romania International

Arhiva :

Cari va u reprezintâ România tu Parlamentul European?
(2007-11-28)
Atea dit soni aspuneari: 2007-11-28 12:31 EET Print
Idyea cu alanti 11 vâsilii aprucheati tu UE tu aeşti 4 an’i, Romania ş-aleapsi ş-ea reprezentanţâl’i tu protili alidzeri europarlamentari ditu istoria ali vâsilie cu unâ prezenţâ la urni di niţi 30 tu sutâ. Media di ilichie a aţiloru 35 di europarlamentari român’i easti anvârliga di 42 di an’i, majoritatea suntu bârbaţ, şi deadunu facu un mozaic di zânăţ şi calificări di la ingineri, economişti şi jurişti, la yiaţrâ, matematicien’i, psihologi, cumu ş-doi prefţâ. Bruxelles, nai ma multu di aestu scrutinu di Bucureşti amintarâ popularl’i europen’i, cari ş-u nvârtuşarâ poziţia ţi u avea majoritarâ tu Parlamentul European pritu marli proţentu ţi-lu lo Partidlu Democrat, cumu ş-pritu voturli ţi li lo UDMR. Protlu di aţel’i 14 europarlamentari ţi-l’i pitreaţi PD easti unu di viceprezidenţâ, Sorin Frunzaverde, cari s-feaţi cunuscutu tu partid tu pazârăpserli ti intrarea tu Partidlu Popular European, dupâ dzaţi an’i di prezenţâ a democraţlor tu Internationala Socialista. Aoa ş-ândoi an’i elu avu portofoliili a Mediului şi respectiv a Turismului, ş-pânâ tu apriir anlu aestu fu ministru ali Apărari. Social-democraţl’i avurâ tu mengâ oamin’i cu experienţâ ti Legislativlu comunitar aşi câ u dişcl’isirâ lista cu Titus Corlatean, secretarlu gheneral a partidului. Reprezentantu a bârnului di tiniri, elu ari şapti an’i tu diplomaţie şi doi ca membru tu Parlamentul European. Unu di numili sonori ditu PSD cari lo ş-elu unu mandat easti Adrian Severin, ma ninti ministru ti politica cu xeanili, luyursitu unu di nai ma activl’i europarlamentari român’i, cari fu nominalizatu, anlu aestu, di publicaţia “European Voice” la premiul Parlamentarlu European a Anlui. Lista a europarlamentarlor PSD, cari va s-şeadâ ninga socialiştil’i europen’i, s-duţi ninti cu alti şapti numi, ş-easti singurlu di partidi tu cari numirlu a europarlamentarlor mul’eri – 5 - easti ma mari di aţelu a bârbaţlor – 4. Rezultatili a alidzerlor apufusirâ câ partidlu a premierlui Călin Popescu Tăriceanu s-creascâ numirlu a eurodeputaţlor liberal’i cu şapti. Lista easti dişcl’isâ di unu juristu – Renate Weber şi un economistu – Daniel Dăianu, doil’i scriaţ tu partid cu maş doi meşi ninti di alidzeri. Di la partidlu nou adrat a Liberal Democraţlor, disfaptu ditu PNL, s-duţi Bruxelles işişi prezidentul Theodor Stolojan, deadunu cu rectorlu ali Universitati “Al.I.Cuza” din Iaşi, Dumitru Oprea. Tutu dauâ mandati amintă şi UDMR, di itia a absenteismului mari ditu vâsilie, ândrupatâ di mobilizarea la vot a electoratlui maghiar. Singurlu candidat independentu ţi putu di amintă easti tutu maghiar. Elu easti episcoplu reformat Laszlo Tokes, di a curi numâ ş-leagâ evenimentili ditu andreu 1989 cari dusirâ la surparea a regimlui comunistu. Câţe tora easti ncâceatu cu UDMR, elu nu vru s-u dişcl’idâ lista ti Uniuni. Autor: Corina Cristea Armânipsearea: Irina Paris

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International