Radio Romania International

Arhiva :

Un referendum ti votlu uninominal
(2007-11-01)
Atea dit soni aspuneari: 2007-11-01 14:09 EET Print
Deţizia a prezidentului Traian Băsescu s- organizeazâ un referendum ti bâgarea a votului uninominal aprindi diznou sţena politicâ ditu Românie. Majoritatea a partidilor au şupeii câ dinclo di naetea spusâ ş-aflâ intenţia a şeflui a statlui sâ-l’i ândrupascâ pi democraţl’i ţi –l’i cumândusi ma ninti la alidzerli europarlamentari. Şi aestâ câţi decretlu mutrinda referendumlu, simnat marţâ di prezidentu, dzâţi câ data a votlui tu aţeali douâ chestiuni va s-hibâ idyea – 25 di brumaru. Şeflu a statlui dzâţi ama câ nica ditu meslu şcurtu ahurhi cilâstâserli ti bâgarea a votului uninominal, câ lo tâxeri di la partidi câ va lu-ndrupascâ, ama câ parlamentarl’i nu şi-u umplurâ obligaţia ţi ş-u avea loatâ ta s-lu adoptâ nomlu pân di işita a meslui cirişaru. Tu aţea ţi mutreaşti ântribarea di la referendum, Traian Băsescu, dzâţi câ (track): “Easti adratâ s-hibâ limbidâ şi tu idyiul chiro s-hibâ neinterpretativâ dimi: «Hiţ sinfun’i ca, ahurhinda cu protili alidzeri cari va s-hibâ organizati ti Parlamentul ali Românie, tuţ deputaţl’i şi senatorl’i s-hibâ alepţâ tu circumscripţii uninominali, pi baza a nâscântor alidzeri cu scrutin majoritar tu dauâ tururi? Dimi striduţearea a întribaril’ei easti desi român’il’i suntu sinfun’i cu alegidzearea a parlamentarlor dupâ idyea procedurâ dupâ cari suntu aleptâ primarl’i, tu circumscripţii uninominali.” Crin Antonescu, viceprezidentu a PNL, ţi easti la guvernari deadunu cu UDMR, easti unu di contestatarl’i ali deţizii a şeflui a statlui, cu ahâtu ma multu cu câtu Guvernul deadi hâbari câ s-u l’ia borgea s-da giuapi tu Parlamentu ti alâxearea a Nomlui electoral. Crin Antonescu (track): “Easti limbid, dupu pârearea a mea, şi pistipsescu nu maş a mea, ca intereslu nimârtirisitu a prezidentului, dinclo di zboarâli muşati şi bunâ parti di eali alithea, apropo di ananghea s-hibâ reformatâ clasa politicâ, apropo di factul câ societatea româneascâ tu mari parti va unâ alâxeari a sistemlui electoral, ama intereslu real a prezidentului easti un interes politicianistu, dimi s-u facâ aestâ campanie electoralâ ti alidzerli a Parlamentului European tu idyiul chiro cu un referendum ti cari s-poatâ s-azburascâ ş-elu ş-ăsi ş-lu ndrupascâ partidlu ţi nica lu cumânduseaşti”. Liderlu PRM (populistu), Corneliu Vadim Tudor, neadzi ş-ma diparti cu acuzili, ş-dzâţi câ şeflu a statlui easti demagog, câ zburaşti urutu ti parlamentari ş-câ inventeazâ lucri falşi. Elu dzâţi câ pritu mintâtura ţi s-faţi prit votarea tu idyea dzuuâ em ti referendum em ti euroalidzeri s-ândregu nâscânti furlâchi electorali, di cari va s-aibâ hâiri PD. Idyea pâreari u au şi UDMR, ţi easti la coguvernari cum şi prinţialu partid di opoziţie, PSD, a curi lider, Mircea Geoanâ, ama, da asiguripseri câ (track): “Va s-ândrupămu iţi iniţiativâ cari va s-ducâ la adoptarea a unui nomu cari s-da izini a român’ilor s- voteazâ la alidzerli parlamentari yinitoari parlamentarl’i ţi âl’i voru ş- di la cari s-poatâ s-caftâ giuiapi”. Ca daima ninga prezidentu, liderlu PD, Emil Boc, luyurseaşti câ Băsescu nu faţi altâ câ maş ş-u tin’iseaşti tâxearea ţi u feaţi a român’iloru s-bagâ votlu uninominal (track): “Cari lu nchidică parlamentul ca di 7 meşi pânâ tora s-lu adoptâ nomlu a votlui uninominal, ta s- nu avemu referendum brumaru? Vârnu. Maş câ, pitu turlii di turlii di tirtipi fu amânatâ adoptarea aiştui nomu, aşi câ român’il’i s-nu poatâ sâ-şi aleagâ parlamentarl’i aşi cumu ş-alegu primarl’i, dimi s-lâ caftâ giuiapi dupu ţi ş-lu bitisescu mandatlu”. Autor: Corina Cristea Armânipsearea: Irina Paris

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International