| ȚI VARIANTĂ DI VOT UNINOMINAL? |
| (2007-10-30) |
| Atea dit soni aspuneari: 2007-10-30 14:39 EET |
Guvernul ali Românie, cumândusitu di liberalu Cãlin Popescu Tãriceanu, și-u lo aieri borgea s-da giuiapi dinintea a leghislativlui, ti unâ variantã a nomlui a votlui uninominal la alidzerli parlamentari, adratâ ma bunâ cu 24 di amendamenti adusi di partide. Ma ninti, prezidentul Traian Basescu avea apufusitâ organizarea, tu idyiul chiro cu alidzerli ti europarlamentari, programati tu 25 di brumaru, a unui referendum ti altu sistem di vot uninominal. Varianta guvernamentalâ easti, unâ mixtâ și fu prota pripuisâ di asociația civicâ ProDemocrația. Aestâ pruveadi alidzearea a unui singur parlamentar tu unâ circumscripție, pi ațel ți amintâ nai ma marli numir di voturi. Ași va s-hibâ aleptâ giumitati di parlamentari, ciara alantâ giumitati va s-hibâ completatâ di candidațli di pi locurli di dupu eli, tu aradha discriscătoari a voturlor, ași câ, pi ansamblu, s-hibâ asiguripsitâ ș- proporția a votlui amintatu di partidi pi nivel național. Prezidentul Băsescu climă, ama, populu ș-u spunâ vrearea i nu ti votlu uninominal majoritar cu dauâ tururi di scrutin, dimi ti unâ variantâ cari va s-dzâcâ: azvingâtorlu lia tutu. Dimi, maca tu protlu tur niți unu candidatu nu amintă barim 50% plus un vot,tu turlu yinitorlu va s-intrâ proțli doi clasaț. Ți spuni premierlu ti sistemlu pripusu di guvernu?: Prit aestu actu nâ lom borgea s-dămu giuiapi ti crișterea a gradlui di responsabilitati a politicienilor andicra di aligãtorli a loru. Prit aestu actu nâ lom borgea s-damu giuiapi ti uidusearea a sistemlui a nostru politic la naua a noastrã calitati di membru ali Uniuni Europeanâ, cu pisti unâ miliuni di români cari bâneadzâ tu xeani. Prit aestu actu nâ lom borgea s-dămu giuiapi ti vigliarea a ândrepturlor a minoritățlor, ca eali sâ s-hârseascâ di unâ reprezentari corectă tu forlu legislativ ali vâsilie. Prezidentul dzâți ama câ pripunearea ti cari guvernul ș-u lo borgea s-da apandasi (track): ari extraordinar di multi alatusi ș- nu u ndreadzi iara dzâcu , nu u ndreadzi pi fondu - problema a restructurarilei ș-a reformarilei a clasâlei politicâ. Dip aliumtra, u da posibilitatea ca și oamini cari nu amintarâ niți macari votlu pi unâ listă s- intrâ tu parlamentu. Nomlu easti rezultatlu a nâscântor acâchiseri politiți. S- vâ spunemu ș- câ, tu plenlu a Senatlui, sâ zburaști unâ a treia variantã di vot uninominal, cari ș-u aduti multu cu ațea pripusă di guvernu. Șansili s-agiungâ nomu suntu ama minimi. Prota ș-prota câțe proiectul ti cari guvernul și-u lo borgea s-da giuiapi nu poati s-hibâ pimtu nanaparti câ maș prit bâgarea și adoptarea unâ moțiuni di cenzurâ, ș-canâ nu lia tu isapi ahtari lucru. Dapoia, câțe easti posibil ca pripunearea a prezidwentului s- nu treacâ la referendum di itia a unâlei slabâ participari la urni, caz tu cari executivlu va s-amintâ. Maș dupu ți easti aprobatâ, parlamentul ari zborlu ditu soni, ama tu Constituție easti ngrâpsitu câ dețizia popularâ easti consultativâ dimi leghislativlu poati sa nu aprobâ varianta a prezidentului, câ unâ a lui.
Autor: Mihai Radulescu
Armânipsearea: Irina Paris
|
2025-04-03
Print
Puteț s-avdzâț căndțido