Radio Romania International

Arhiva :

Guvernul, dinintea a unăl’ei nauă moţiuni di cenzură (19.10.2010)
(2010-10-19)
Atea dit soni aspuneari: 2010-10-27 15:21 EET Print
Chiro di dauă dechenii ş-cama di democraţie parlamentară, opoziţia dit România aprăftăsi maş ună oară tra să-lu surpă guvernul prit moţiuni di cenzură. S-feaţi aoa şi un an ma ninti, ama geaba s-feaţi. Alidzerli prezidenţiali dit 2009 fură ndreapti di idyiul cabinet Emil Boc, a curi loialitati andicra di caplu a statlui, Traian Băsescu, vărnăoară nu fu infirmată. Aţea dit soni moţiuni contra a guvernului PDL – UDMR – UNPR (Uniunea Naţională tră Progreslu ali Românie) cădzu, astă veară, maş ti ndauă voturi. Atel’i ţi băgară semnul pi moţiuni - parlamentarl’ii ali opoziţie PSD, PNL şi PC - au nădie că ti votlu dit 27 di sumedru va s-amintă demiterea a cabinetlui, maxus că aestu pari s-hibă maş el gol dit Europa ţi nu ari replică la fenomenlu ali represiuni economică. Aţeali trei formaţiuni luyursescu că actuala guvernari lipseaşti s-alasă putearea, căţe aspardzi aţel’i doi sturi pi cari s-ntimi’iadză iţi suţiitati libirâ şi tu prucuchie: economia şi instituţiili fundamentali a statlui di dreptu. Opoziţia ari vrearea ma s-hibă di cadi cabinetlu PDL – UDMR – UNPR, s-adară un guvernu di criză cari s-aducă isihie suţială şi s-ndreagă alidzeri ninti di chiro ti nai ca pţăn şasi meşi. PSD, PC şi PNL vor, pi ningă alti lucri, şi păzărăpsearea diznău a angajamentilor cu FMI şi Banca Mondială, turnarea la n’icşurarea cu 25% a tin’iilor di cafi mes a bugetarlor şi nimpozitarea a pensiilor sum praglu di ună n’ili’e di lei. Prezidentul a PSD, Victor Ponta, lă căftă a parlamentarlor PDL s-hibă responsabili andicra di aţel’i cari lă deadiră votlu şi s-andrupască moţiunea. Victor Ponta: „Fac ună acl’imari la oamin’i s-lă caftă a aţilor di la PD-L s-nu ş-arădă di el’i. Ma s-hibă gion’i, s-voteadză moţiunea di cenzură; ma s-hibă vinduţ şi să-l’ia aibă acăţată tu mănă, s-da votlu di contra”. Ti prezidentul a PNL, Crin Antonescu, moţiunea da apandisi a niifharistusearil’ei spusă di nai cama mulţă di român’i ş-ti aţea nădiili a l’ei crescu. (track): „Zburăm ti lucărlu ţi spuni că demisia a Guvernului easti căftată nu maş di noi, nu maş di sindicati, că nica ş-ma multu, di mulţă român’i. Avem mări nădii”. PDL ari , ama pistusini tu suţăl’ia anamisa di aţel’i ţi suntu tu coaliţie. Viţeprezidentul democrat-liberal, Gheorghe Flutur: „Suţata easti adunată stres, vărtoasă ş-nu va s-voteadză, nu va u aproachi ici aestă moţiuni”. Protlu soţ guvernamental, UDMR, spuni că niţi nu easti zborlu ti un vot a parlamentarlor a l’ei contra a guvernului işiş. Senatorlu Verestoy Attila: „Noi hm sigura că nu putem s-nu apruchem niţi ună căliseari politică la ună moeabeti, ama cundil’em nica dit ahurhită: nchisim dit arada tu cari him tru coaliţia guvernamentală ş-nu him tu catastisea tra să zburăm ti votlu contra a noastră”. Cara executivlu va s-ascapă niagudit, ună ş-ună a daua dzuuă va ş-l’ia borgea ti Nomlu ali educaţie, iara Constituţia da izini, tu aestă catastisi, ali Opoziţie, s-dipună ună nauă moţiuni di cenzură. Textul: Ştefan Stoica Armâneaşti: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International