| Cantelarlu ghirman tu Romania 12.10.2010 |
| (2010-10-12) |
| Atea dit soni aspuneari: 2010-10-27 15:21 EET |
 Dupu 130 di ani de la apufusearea a ligaturlor diplomatiti romano-germane, cantelarlu Angela Merkel vini, aza, Bucuresti, ta s-aproachi vrearea a Berlinlui ti s-li duca ninti ligaturli di dauli parta, tu plan economic si politic cu Romania. Aderarea ali Romanie la Spatiul Schengen, coruptia, stabilitatea economica si amintarea a fondurlor di la UE fura, dimi protili lucri pi cari ufitialu german li zbura cu prim-ministrul Emil Boc. La conferinta di presa, ea declara ca aderarea ali Romanie la Spatiul Schengen, minduita ti meslu martu 2011, va s-hiba apufusita di UE pi thimelilu a niscantor criterii obiectivi, bagati ahoryea Romanie si ali Vargarie - a daua vasilie ti easti cu nadiili ti integrari. Doamna Merkel spusi ca ari steari ti marli gaeret a autoritatlor di Bucuresti ta s-li treaca griutatli a crizalei economiti, si u spuni umutea ca guvernul roman va s-baga tu lucru meatrili ti suntu ananghi. Ea cundile, tutunaoara, ananghea ti dutearea ma largu ama si a monitorizarilei cu ngatan a reformilor tu justitia romana, nica si prit mecanismili instituite di UE, cu scupolu di bitisita, nicsurarea ali arusfeti. Tu plan regional, Romania si Germania mutrescu scupolu deadun ti ndridzearea a niachicasearilei transnistreana, spusi cantelarlu, adavganda ca dauli vasilii lucreadza deadun pi aesta tema, tu arada ali UE. Apuntea di ligatura anamisa di Romania si Germania poati s-armana tu idyea scara prit andruparea di catra statlu roman a ndrepturlor si a nadiilor ali minoritati germana dit Romania. Tu aesta noima, premierlu roman Emil Boc adusi aminti vrearea a Bucurestiului ta s-da sila a lucurlui desdun interguvernamental ti tanearea tu bana a patrimoniului cultural german dit Romania. Tu arada ali conferinta di presa, Emil Boc zuyrapsi sinferlu ali Romanie ti cristearea a investitiior germane tu Romania. Cu un volum a alaxerlor di emburlachi di 7,8 miliardi di euro, tru cristeari cu 19% andicra di anlu ti tricu, Germania easti protlu partener externu ali Romane. Angela Merkel vini Bucuresti ma nu s-cu delegatia economica; aesta nu poati s-hiba interpretaa ca un semnu a scadearilei sinferlu di partea a investitorlor germani ti Romania; ma multu: presa romana nyrapsea aprindu vizita, ca Germania va s-disclida, tu Romania, una mari investitie tu dumenea constructiili di aftuchinati, ti va s-aduca nai locuri di lucru. Cu pitipsearea ca Germania va s-baga paradz tu lucru, tu Romania, primlu ministru roman hiritisi, tutunaoara apofasea a Berlinlui ta s-liberalizeadza, di la 1 di yinar 2011, pazarea germana a lucurlui ti lucratorlii sezonieri ti yin dit Romania.
12.10.2010
Textul: Valentin Tigau
Armaneasti: Tascu Lala
|
2025-04-03
Print
Puteț s-avdzâț căndțido