| Un mari scandal politic ș-mediatic |
| (2007-10-12) |
| Atea dit soni aspuneari: 2007-10-12 14:40 EET |
Tu aestâ stâmânâ, tu cari Comisia Europeanâ feați timbihi a Bucureștiului sâ-și bagâ pi aradhâ mintâturli ditu sistemlu di pâlteri tu agriculturâ tu unu mesu di dzâli, câ altâ turlie va s-chiarâ importanti fonduri comunitari, titularlu di la ministerul di resortu ali Românie, Decebal Traian Remes lu apârnâsi postul, di itia a stepsului di arușfeti ți ăli si bagă. Fârâ niți unâ ligâturâ cu atenționarea ți vini București di Bruxelles, ântreaga isturie agiumsi tu cipit, niercuri, cu prezentarea pi postul național di televiziuni a unâlei ânreghistrari faptâ cu camera ascumtâ tu cari easti spusâ unâ discuție anamisa di Remeș și unu ministru di ma ninti ali agriculturâ, Ioan Avram Mureșan, ti agiutarea a unui om ți fați emburlâchi sâ-și vindâ părmâtiili la statu. Nica ditu ahurhita a sâptâmânilei, Direcția Naționalâ Antiarușfeti avea câftatâ avizlu a prezidentului Traian Băsescu tiu ahurhearea ali mutreari penalâ a ministrului liberal ali agriculturâ tu aestu dosar. Ama, câțe Remes dzâsi câ nu feați lucri psefti, premierlu Călin Popescu Tăriceanu iși dinitea a presâlei și ș-u aspusi ândruparea ti ministrul ali agriculturâ. Catandisea s-alâxi la 180 di gradi dinintea a noilor mărtirii, iara premierlu lu feați Remeș s-demisioneazâ. Presa, cari da spații lărdzâ a subiectului, ângreacâ ma multu pi prezentarea ali ânreghistrari adusâ aminti di televizunea naționalâ, cari nu vru ș-li spunâ sursili. Departamentul Național Antiarușfeti, Consiliul Superior ali Magistraturâ și Consiliul Național a Audiovizuallui câftarâ ancheti, audieri și verificări ti aflarea ațuiloru ți li deadirâ informațiili. Tu condițiili tu cari respectiva ânreghistrari prezintâ proba la un dosar, di dauâ dzâli ântribarea nai ma avdzâtâ easti «Cari u deadi ânreghistrarea la Televiziuni» ? Easti șupeie ș-ti șeflu a statlui, Traian Basescu, cari gioi seara dzâsi câ înregistrarea ali discuție anamisa di Remeș ș-Mureșan nu vini di la Prezidenție (track) : « Mini categoric nu am pitricutâ la vârnu niți macari un peatic di carti ditu aestu dosar. Potu s-vâ spunu câ ari duri alti documenti tu aestu nica ș-ma greali di imprimarea video. » Tu aradha a lei, șefa a departamentului hâbări TVR, Rodica Culcer, spuni câ nu feați alatusi cu difuzarea a ânreghistrarlei și prețizeazâ câ nu ari umuti ș-u da demisia. Rodica Culcer spuni câ lo dețizia di spunearea a imaghinilor câțe luyursi câ easti tu intereslu public ca imaghinli s-hibâ prezentati. Televizunea Naționalâ avea datâ hâbari ca gioi seara va s-difuzeazâ daua parti ali ânreghistrari, ama prezidentul director gheneral ali TVR, Alexandru Sassu nu deadi izini. Publicațiili ți ișirâ azâ București bâgarâ pi prota frândzâ subiectul. EVENIMENTUL ZILEI : « cenzorlu șef ali TVR » easti Alexandru Sassu, cari preciză că duțearea ninti a nâscântor ahtări materiali similari nu easti corectâ, legalâ și oportunâ ». Editorialistul a jurnalui GANDUL, Cristian Tudor Popecu, prezidentul a Clubului Român di Presâ aduți aminti câ « Televiziunea publicâ nu ari izini sâ s-measticâ tu alumta politicâ di unâ parti icâ di altâ, iara prințipiili a lei di lucru nu suntu maș ațeali comericiali ».
Autor : Teofilia Nistor
Armânipsearea : Irina Paris
|
2025-04-03
Print
Puteț s-avdzâț căndțido