| Obiectivi pentru alegerili europeane |
| (2007-09-28) |
| Atea dit soni aspuneari: 2007-09-28 12:42 EET |
Amânati, tu primvearâ, di premierlu Călin Popescu Tăriceanu, pi fondul ali catandisi tensionatâ di pi sțena politicâ di la București, protili euroalidzeri ditu istoria ali Românie intrarâ tora tu linii dreaptâ. Partidili ș-bâgarâ listili di candidaț, campania electoralâ va s-ahurheascâ pisti unu mesu ș-tu 25 di brumaru aligâtorli suntu aștiptaț la urni. Cu detalii tehniți ti euro-scrutin, prezidentul a Biroului Electoral Chentral, Gheorghe Florea (track): « Furâ înreghistrati listi di candidaturi ti Parlamentul European di partea a partidilor reprezentati parlamentar, partidi nireprezentati parlamentar și organizații a minoritățlor naționali, listi completi, dimi ti tuti ațeali 35 di locuri eligibili ti Parlamentul European, și listi cu mai puțâni candidaturi. Avem și unâ singurâ candidaturâ independentâ. Unâ mutritâ pisti listili di candidați nâ spuni câ niți tinia di cafi mesu, di vârâ 7000 di euro, niți posibilitatea s-lucreadzâ directu tu politica europeanâ tu ișiși chentrili di dețizii di Bruxelles și Strasbourg nu suntu duri argumenti ti nai ma cunuscutili numi politiți ditu Românie. Ti ațea, cu niț excepții, anamisa di candidaț nu aflămu lideri di partidi. Unâ posibilâ explicații easti ațea câ, maca aești va s-avea scriatâ tu cursâ, vrea s-putea și s-amintâ, ș-vrea s-lipsea s-aproachi unu mandat di europarlamentar di 18 di meși tu loclu a unui locu ti patru ani tu Parlamentul di Bucuresti. Vârnu nu li garanteazâ ca la yinitorlu euroscrutin, ditu meslu cirișaru 2009, va lâ armânâ numa pi listi, ș-tu aestu chiro va-lu chiarâ ș-capitalu di popularitati tu vâsilie. « Un mandatu di eurodeputat s-pari unâ surguni tu Siberia, tu condițiili tu cari, ca membru a Parlamentului European, nu poț s-agioț niți unu rolu la tini acasâ », sintetizeaza analistul politic Cristian Pârvulescu. Cu tuti câ nu au niți unâ ligâturâ cu politica internâ, europarlamentarili au, ama, unâ mizâ mari ti partidi: rezultatili prefigureazâ optiunili a românilor la alidzerli locali și parlamentari di anlu ți yini. Armâni s-videmu care va-li cândâseascâ aligâtorli s-yinâ la urni. Nai ma probabil puțâni va s-hibâ ațeli interesaț, tutu ași cumu fu ș-tu « naua Europâ », dimi tu ațeali 10 vâsilii aprucheati tu UE tu 2004, iu rata a participarilei la votu fu di maș 28%. Câțe va s-amintâ un scor cât ma bunu, Aghenția Naționalâ di Strateghie Guvernamentalâ deadi hâbari câ va s-dizvârteascâ unâ campanii multu sânâtoasâ di informari a cetățenilor, iara Consiliul Național a Audiovizualului tâxeaști șansi isa. Prezidentul ali instituție, Răzvan Popescu: « CNA își pripuni ca tu aestâ campanie s- asiguripseascâ condiții cât u cama echitabili (isa) ti tuț participanțâli, condiții tu cari eli s-poatâ ș-lu facâ cunuscutu mesajlu, s-aibâ condiții câtu ma buni ta ș-li spunâ programili ».
Autor : Corina Cristea
Armânipsearea : Irina Paris
|
2025-04-03
Print
Puteț s-avdzâț căndțido