Radio Romania International

Arhiva :

Impărmuturi şi protesti (23.09.2010)
(2010-09-23)
Atea dit soni aspuneari: 2010-10-07 14:08 EET Print
Prezidentul român, Traian Băsescu, declara, marţâ, tu plenulu a Parlamentului, că dezechilibrili macroeconomiţi u leagă, practic, România di împărmuturi pi lungu chiro. Tu aesti condiţii, un nău acordu di împărmut cu FMI easti orlea zorlea să s-facă şi el va s-hibă simnat tu 2011, nica spusi Traian Băsescu. Ună ş-ună a daua dzuuă, premierlu Emil Boc dimăndă că discuţiile anamisa di autorităţli române şi ufiţial’i a Fondului mutrindalui simnarea a unlui nău acordu va s-ahurhească tu meslu sumedru. Turlia ti cum va s-hibă yinitoarea achicâseari va u apufusească guvernul ş-di Banca Naţională. Un lucru easti, ama, sigura: FMI numata va s-aproachi că păradzl’i ţi va-l’i da mpărmut ali Românie s-hibă ufilisiţ ti păltearea a tin’iilor di cafi mes ş-pensii. Prezidentul Traian Băsescu: „Acordul cu Fondul va s-hibă ună realitati. Ti turlie di acord va s-hibă, armâni s-apufusim şi easti lucărlu a guvernului, a Băncăl’ei Naţională, ama easti sigura că va s-aibă, un acordu cu Fondul Monetar Internaţional. Vahi va s-hibă un acordu tu cari s-hibă zborlu ş-di finanţari, aţea ţi easti puţăn acăţat tru isapi, ică nica ma ghini spus, va s-hibă un aşi-număsit acordu faptu cu ngătan tu cari, tu catastisi excepţionali, s-putem s-făţem căftari la Fondu, ama nu s-faţi zburari ici că, Fondul Monetar Internaţional s-aproachi finanţarea a ixichil’ei di la bugetlu di stat ali Românie”. Cari ţi s-hibă turlia di acordu ti cari s-agiumsi tu achicăseari cu Fondul, a aiştui va-l’i si adavgă idyea cata cum ş-tu formula di tora, Comisia Europeană, haristusită di evoluţia a programlui di asistenţă simnat cu România, aşi cum spuni Laurent Moulin, şeflu ali divizie ti România, Polonia, Cehia şi Slovacia a executivlui comunitar. Aduţem aminti că, tu 2009, România simnă un acordu di împărmut tu valoari di aproapea 20 miliardi di euro cu Fondul Monetar Internaţional, Comisia Europeană şi Banca Mondială şi Banca Europeană ti Reconstrucţie şi Dezvoltare. Economia românească easti sum potenţial. Aestă easti isapea a ufiţialui european, ţi pistipseaşti ama, că România poati s-agiungă la ună crişteari economică di 3% tu yinitorl’i an’i, ma s-bagă tu lucru reformili. Ş-cara aesti va s-hibă pi zverca suţială, ari căbilea să s-adavgă. Sindicatili, prota ş-prota aţeali bugetari, spuni, ama, tut ma multi seamni di inati. Cama di 10 n’il’i di oamin’i l’i-aurlară păn di mardzina n’iercuri, pi guvernanţă tu ţentrul a Bucureştiului, caftăndalui s-n’icşureadză tin’iili di cafi mes dit sectorlu public pi nivelu di ma năinti ta s-hibă n’icşurati cu 25%, s-dănăsească concedierli şi s-lu ajusteadză proiectul a nomlui tră tin’iili di cafi mes ună turlie unitară. Di New York, Boc lă dimăndă a sindicatilor că meatrili di sirţăl’e suntu duriroasi, ama di ananghi. Guvernul – spuni Emil Boc – easti anănghisit s-li andreagă alathusili mări şi ţi custusescu, dit construcţia a sistemilor di salarizari ş-di pensii cata cum şi aţeali dit programili di asistenţă suţială, alathusi cari deadiră cali ti nilucrari şi dusiră, tru minduita a primlui ministru, la ixichili structurali di tora. Presa ţentrală bagă oară că, acă la mitinglu sindical di n’ercuri nu eara duşi ahănţă manifestanţă cât ş-avea tu minti organizatorl’ii, aeşţă ama loară silă ş-mutară cap. S-agiumsi – spun jurnalili – la pindzeari un alantu cu forţăli di arada, ţi vidzură zori ta s-ufilisească spray lacrimogen tra s-li isihăsească spiritili. „Oamin’i ma puţăn, mesaji ma serti”, nyrăpseaşti jurnalu GÂNDUL, chiro tru cari cotidianlu ţi andrupaşti putearea EVENIMENTUL ZILEI luyurseaşti că supraliţitarea a minaril’ei sindicală şi compromiterea a niscăntor lideri dusiră la ixichea di solidaritati ş-la protesti ţi nu avură hăiri. „Protestul a sindicaliştilor nu adusi hăiri ti furn’ia a niachicăsearil’ei anamisa di lideri” spuni tu un comentariu şi jurnalu ROMÂNIA LIBERĂ. Textul: Ştefan Stoica Armâneaşti: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International