| Romilii ali Europă (10.09.2010) |
| (2010-09-10) |
| Atea dit soni aspuneari: 2010-09-10 16:33 EET |
Schinlu a ligăturălei ali Romanie cu Frantia, problema a ghifțălor, agiumsi themă di prota tesi si pi agenda europeana. Expulzarili a ghifțălor (romilor) dit Frăntia tu Romania si Văryăria (ti ațeli ți aproachi păradz), i repatrierili aiuștor , cum suntu mutriti Paris, agiumsiră tema ali rezolutie a Parlamentului European. Aestă cătuyursi expulzarili si căftă dănăsearea a lor ntroară. Rezolutia, cari nu ari un caracter obligatoriu, fu mutrită cu harauă Bucuresti. Aliumtrea , Parislu tricu ayonea pisti minutișlu ali rezoluție ș-deadi habari ca repatrierili va s-ducă ninti. Romania, iu s- afla nai ma marea comunitati di ghifta di Europa, aduți aminti ti ndreptul la libera urdinari dinauntrul ali UE, chiro tu cari Frantia zburaști ti legislatia nationala si internațională si lă aduți stepsu a ghifțălor tiganilor, prit boațea a prezidentului Nicolas Sarkozy, misticarea tu crimi, putânălăchi, dicuniriat si exploatarea a nicăzațălor. Sensibilu dosar bilateral fu si tema moabețlor ți li avură, gioi, Bucuresti, doi importantă oficiali francezi ministrul ti Imigratie, integrari si identitati nationala, Eric Besson, si secretarlu di stat ti Afaceri Europeni, Pierre Lellouche. Tu andamusili ți li avură cu ministrul di Externi, Teodor Baconschi, cu responsabilu di la Interni, Vasile Blaga, si cu atel di la Lucru, Ioan Botiș, pitricuțlii a Parislui căftară s-lia tăxearea a Bucurestiului ca va s- asiguripsească integrarea a ghifțălor tu societatea autohtona. Partili s-achicăsiră s-colaboreadză ta s-lia fonduri maxus di partea a UE, ta s-adară ma bună bana a ghifțălor tu Romania. Eric Besson deadi hăbari ca moabețli anamisa di Paris si Bucuresti va s-ducă ninti la cipit, anamisa di prezidentul ali Romanie, Traian Basescu, si omologul a lui, Nicolas Sarkozy. Ndilicata problemă diplomatica anamisa di Romania si Franta anastăsită nica dit alunar, anda Parislu ahurhi s-demoleadză taburi paranom di ghiftă di la mardzina a mărlor casăbadz. Lellouche dzăsi că Franta ari născănti șubei mutrinda intrarea ali Romanie tu spatiul Schengen tu 2011. București, ama, el declară ca dosarlu Schengen nu ari niți ună ligatura cu problema a ghifțălor.
|
2025-04-03
Print
Puteț s-avdzâț căndțido