Radio Romania International

Arhiva :

România tru Cupili Europeani la fotbal
(2007-08-31)
Atea dit soni aspuneari: 2007-08-31 14:13 EET Print
După aestă stămână fotbalistică europeană, România armâni tru toplu a fotbalui continental pi nivelu di cluburi. Ti a daua oară arada, easti reprezentată tru Liga a Campionilor. Şi, diznău, performera easti Steaua Bucureşti, cari agiundzi ti a ţinţea oară tru grupi. Al’iumtrea, echipele româneşti cari agiucară, aesti dzăli, tru Cupili Europeani, nu adusiră haristuseari. Steaua s-califică tru Liga a Campionilor după ţi n’ercuri dicseară, Bucureşti, tricu cu 2 - 0 di campioana a Ripublicăl’ei Belarus, echipa BATE Borisov, tru manşa a daua a aţilui dit soni tur preliminar a Ligăl’ei. Tru prota manşă, dizvărtită aoa şi dauă stămăn’i Belarus, scorlu fu isa, 2 la 2. Steliştil’i avură di partea a lor experienţa superioară, ama şi forma bună a portarlui columbian Robinson Zapata, cari ş-ascăpa di ma multi ori echipa. Agioclu a viţecampionilor român’i nu yilipsi, ama să spusi hăirlătic. Tru grupili a Ligăl’ei ama, va s-hibă multu ma greu. Trădzearea a şcurticăl’ei u repartiză pi Steaua tru grupa H, deadun cu Arsenal Londra, Slavia Praga şi amintătoarea a restanţăl’ei anamisa di FC Sevilla şi AEK Atena. Easti, vahi, ună di nai ma grealili grupi. Britaniţl’i agiucară, tru ediţia dit 2005 – 2006, finala a Ligăl’ei, pi cari u chirură dinintea ali Barcelonă. Sevilla amintă, anlu ţi tricu, Cupa UEFA, după ţi, tru chirolu a competiţil’ei, tricu ş-di Steaua. Ună echipă redutabilă easti şi Slavia Praga, şi aestă s-veadi dit aţea că ti calificărli tră grupili a Ligăl’i tricu di Ajax Amsterdam, după dauă victorii. Steaua agioacă prota a l’ei partidă dit grupă contra ali Slavie, pi 19 di yismăciun, tru deplasari. Cara steliştil’i la a ţinţea prezenţă tru Liga a Campionilor, Dinamo Bucureşti easti la aţea di a ţinţea ratari a calificaril’ei. Marţă, Bucureşti, campion’il’i ali Românie fură azvimţă, tru manşa secundă a aţilui dit soni tur di calificari, di pareia italiană Lazio di Roma, cu scorlu di 3 la 1. Tru prota partidă, di Roma, scorlu fu isa: 1 la 1. După eliminarea dit antriţearea tră Liga a Campionilor, Dinamo Bucureşti s-duţi tru Cupa UEFA, ndreptu tru protlu tur, aclo iu easti şi Rapid Bucureşti, ţi easti amintătoarea a Cupăl’ei ali Românie. Alti dauă echipe româneşti ratară calificarea tru Cupa UEFA. Easti zborlu di Oţelu di Galaţi (sud-est) şi CFR di Cluj (ţentru). Gălăţen’il’i fură eliminaţ di echipa vărgară Lokomotiv Sofia, după 1 la 3 tru deplasare şi 0-0, gioi, pi teren propriu. Mecilu di acasă putea s-lă aducă calificarea, ama “oţelarl’ii” ratară tuti multili ocazii di gol ţi li avură. CFR Cluj chiru, aoa ş-dauă stămăn’i, acasă, cu 1 la 3 dinintea a ciprioţlor di la Anorthosis Famagusta, iara gioi, tru deplasari, nu aprăftăsi ma multu di ună remiză, agiucăndalui slab şi fără inspiraţie. Textul: Florin Orban Armânipsearea: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International