Radio Romania International

Arhiva :

Mpărmuturli la român’i (26/08/10)
(2010-08-26)
Atea dit soni aspuneari: 2010-09-16 13:20 EET Print
Piricl’iul di mpărmut armâni prota luyurie crehtă tru sectorlu bancar românescu di furn’ia a scarăl’ei mari di armâneari borgi a bănătorlor, feaţi timbihi Banca Naţională tu un raportu mutrindalui stabilitatea financiară. Aşi cum spuni BNR, tu inşita a meslui cirişar, cama di 4,5 miliun’i di român’i, dimi aproapea 50% dit bănătorl’i ţi lucreadzâ, a văsiliil’ei, avea nai ma puţăn un mpărmut la banca. Nai ma tru piricl’iu categorie tu ţi mutreaşti darea năpoi a păradzlor suntu ama aţel’i 500 di n’il’i di inşi cari au, tut cu tut, câti trei mpărmuturi. Tu bitisita a meslui alunar, valoarea a borgilor a aiştor inşi agiundzea la 3,4 miliardi di euro. Idyiul raportu spuni că rata a mpărmuturlor niperformanti, cu restanţi ma mări di 90 di dzăli, alină di la 2,8% la 10,2%, di trei ori ma multu andicra di 2008. Si borgili ma mări di 30 di dzăli agiumsiră s-hibă triplo tu 2-l’i an’i dit soni şi criscură tru proţl’i şasi meşi a anlui 2010, di agiundzi la ună scară di 6 proţenti. Ama, ari şi ună hăbari bună, nai ma multi mpărmuturi niperformanti suntu aţeali di valoari n’ică, di aproapea 1200 di euro, şi yinu dit mpărmuturi di consum ică di anănghiseri personali, ţi s-da maş cu buletinlu, tru chirolu 2004-2007. Al’iumtrea, numirlu a borgilor di tu arada a aţilor cari loară mpărmut cu ipoteca, easti n’icşurat, maş cu 3%. Experţăl’i spun că hala va s-agiungă ş-ma lae tru chirolu ţi yini di furn’ia a meatrilor ţi s-loară di cătră guvernu: criştearea a TVA di la 19 la 24 di proţenti şi n’icşurarea a tin’iilor di cafi mes a bugetarlor cu 25%. Tut cu tut mpărmuturli ţi s-deadiră a lucrătorlor di la stat suntu di aproapea 20 di proţenti dit totalu a mpărmuturlor, aeşţă avăndalui ti dari năpoi a bănţalor aproapea 4,8 miliardi di euro. Tru raportul a BNR s-faţi isapi că bănţăli dit România nu va s-nreghistreadză profit tru 2010, că va s-bitisească pi zero tu nai ma bunlu caz, iara 2011 nu va s-hibă niţi el ma bun. Bănţali agiumsiră pi chireari tru prota giumitati a aiştui an, prota ş-prota di furn’ia a criştearil’ei cu hărgili. Ună isapi faptă di Banca Naţională tru arada a bănţalor dit văsilie, spuni că valoarea tut cu tut a provizioanilor (rezervili fapti di bănţa tra s-anvălească mpărmuturli niperformanti) va s-crească cu nai ma pţân 38%. Cu tuti aesti, solvabilitatea a bănţâlor dit România armăni pi un level analtu, cama di 13%, cu 3 proţenti ma multu di scara faptă timbihi di banca ţentrală. Textul: Andreea Bojoi Apriduţearea: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International