Radio Romania International

Arhiva :

Sistemul sanitar, slăghit şi crehtu (17.08.2010)
(2010-08-17)
Atea dit soni aspuneari: 2010-08-25 11:12 EET Print
Fănicolu cari s-feaţi la ună maternitati di Bucureşti, iu explozia ţi ditu sala di reanimari vătămă ma mulţă naţ, năpoi u aprindi, ună turlie iruşea şi cu dureari, moeabetea anvarliga di sistemlu medical românescu. Aestu, acă easti zborlu ti un niminduit accidentu, di furn’ia a unlui scurtcircuit ţi s-feaţi la instalaţia di aer condiţionat. Procurorl’ii suntu tu anchetă, cu aestu caz şi va-l’i află, cadealithea pi aţel’i ţi au căbati. Diagnosticlu, tut cu tut, fu băgat, ama di multu chiro: sistemlu di sănătati dit România easti lăndzidu, ună formulă clişeu ţi u da, ama, păn di mardzină realitatea. Chiro di dauă dechenii, un loc multu vrut, deadun cu sistemlu di educaţie, ti ampuliserli politicianisti, sistemlu sanitar nu easti duri agiutat cu păradz. Prit arăn’ile a lui multu mări ies tu videală indiferenţa şi, ma arău, iresponsabilitatea, cari să spuni - ia – ca ună ţi vatămă oamin’i n’iţ, naţ aestă aradă. Reformili ună dupu alantă ţi avură tu mengă sistemlu di sănătati nu fură vârnâoarâ dusi păn di mardzină, iara cadrili medicali tiniri - yiaţră şi asistenti – caftă s-fugă dit aestu sistem cătă statili occidentali iu au nădia că va s-hibă păltiti multu ma ghini. Pisti slâghinţili istoriţi vini recesiunea economică prilundzită dit România. Tăl’ierli serti a hărgilor cu ancupărărli şi tin’iili di cafi mes dusiră la ună slăbinţă cu tehnea tu spitali şi cliniţ, iu lăndziţl’i suntu tu ananghi ta ş-ancupără yitriili şi tehnea sanitară ţi easti ananghi. Slab păltiţ, ţinti permanenti a şubeiil’ei că nu aproachi tra s-facă un lucru medical ma s-nu lă si da multu cunuscuta „atenţie” / ”tăxeari”, 7 dit 10 lucrători a sistemlui sanitar acaţă tru isapi căbilea ti emigrari ta s-lucreadză tu alti stati ali Uniuni Europeani, iu ari ixichi di personal iara locurli di lucru sunt cu sinfer. Aşi cum spun isăchilui fapti di Colegiul a Yiaţărlor dit România, cama di 50% dit yiaţări va s-fugă până tu 2015, di furn’ia a tin’iilor di cafi mes şi a condiţiilor di lucru ma buni. Naima căftaţ suntu anesteziştil’i, yiaţărl’i chirurdză, cardiologil’i şi specialiştil’i tu chirurgie cardiovasculară, prota ş-prota, tu Germania şi Marea Britanie. Yinitorlu nu să spuni ici ghini – comenteadză JURNALUL NAŢIONAL – ma s-acăţăm tu isapi şingirlu di nitin’seari andicra di cadrili medicali tu chirolu dit soni – scădearea a tin’iilor di cafi mes, tăl’iearea a sporurlor, niacăţarea tu isapi a pregătiril’ei profesionali. Iara Colegiul a Yiaţărlor faţi timbihi că, ma s-hibă di fenomenlu ali emigraţie va s-ducă ma largu, ti trei-patru an’i, nu mata va s-aprăftăsim s-asiguripsim mutrearea a pacienţâlor aşi cum spun standardili europeani. Textul: Ştefan Stoica Apriduţearea: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International