Radio Romania International

Arhiva :

Isapea a finanţatorlor internaţionali (05.08.2010)
(2010-08-05)
Atea dit soni aspuneari: 2010-08-16 11:28 EET Print
România ş-tin’isi borgili apufusiti prit acordul stand-by simnat cu Fondul Monetar Internaţional, Comisia Europeană şi Banca Mondială, ţi adunâ aproapea 20 miliardi di euro. Aestâ easti concluzia a misiunil’ei dupu isapea ţi u feaţiră Bucureşti experţăil’i a Fondului, cari dimăndară, n’iercuri, că România ari dichi tra s-l’ia yinitoarea parti a împârmutului, di aproapea 900 miliun’i di euro. Di altă parti, ama, delegaţia a FMI năpoi u mutri isapea mutrindalui crişterea economică di estan. Di furn’ia a problemilor tru tută reghiunea, ama şi a nicărlor şi a căftaril’ei internă scădzută, economia românească va s-apridună tru 2010 cu nica 1,9% şi tăş di vără an poati s-aibă nădii ti ună lişoară crişteari. Ti aţea, caplu a misiunil’ei FMI, Jeffrey Franks, feaţi şi urminia ti duţearea ninti a meatrilor di sirţăl’e apufusiti di Guvernu ţi au tru amprotusa tăl’iarea un cirec a tin’iilor di cafi mes dit sectorlu bugetar şi criştearea a TVA di la 19 la 24%. El nu agărşi niţi tra s-cutuyrsească slaba amintari a fondurlor europeani, cari poati tra s-hibă ună ascăpari ti economia ţi easti tru greauă lăngoari. Jeffrey Franks : Isăchili dit multi stati spun că ună văsilie ţi ari mări problemi fiscali ari şi griutăţ importanti tu ţi mutreaşti agiundzearea la ună crişteari economică. Noi videm ajustarea fiscală ca hiindalui prota politică di thimel’iu ti agiundzearea diznău la criştearea economică. Nai ma importantă apofasi ti dari silă tru economie, tu aestă oară, ti România lipseaşti s-hibă aduţearea căt cama ntrăoară a fondurlor europeani.” FMI nica feaţi timbihi a Executivlui di Bucureşti ti duţearea ma largu a reformilor tru dumenea a programilor di asistenţă suţială, ahurhearea a proţeslui di privatizari şi restructurari a întreprinderlor di stat, cum şi anvărtuşearea a sistemlui di reglementari şi avigl’iari a sectorlui bancar. Păradzl’i dit yinitoarea parti di mpărmut nu sunt ti hărgiueari, căţe va s-agiungă la Banca Naţională, cari val’i ufilisească ti anvărtuşearea a rezevâl’ei valutară a văsiliil’ei şi ţănearea tru idyea scară a cursului di alăxeari. Caplu di facto a Guvernului, prezidentul Traian Băsescu, cundil’e şi năs că meatrili di sirţăl’e acaţă s-hibă ţănuti nu maş tru idyea scară ama şi ahăndusiti: „Tora suntu acti normativi apufusiti ti scutearea di pi lucru 74.000 di oamin’i dit sectorlu bugetar. Nu easti duri, tu minduita a mea. Ma s-nu duţem ninti meatrili di sirţăl’e ş-tu 2011, nu va u băgăm România nu va ş-yină tru ori. Mărli dezechilibri la cari s-agiumsi di furn’ia a apofasilor dit 2007 şi 2008 lipseaşti s-hibă băgati pi aradă tru 2010 şi tru 2011.” Prezidentul feaţi timbihi ş-ti ixichea dit sistemlu di pensii, cari, prit ţânearea ma largu a leghislaţil’ei di tora dit dumeni, poati s-agiungă la 4,5 miliardi di euro tru 2013. Şi, neise, l’i-trapsi sertu di ureacl’e, ama ca un părinti, pi membril’i a Guvernului, cari, ună ş-ună dupu ţi experţăl’ii di la FMI şi spusiră concluziili, iruşi s-ayun’iusiră s-dimăndă că ahurhindalui cu anlu ţi yini, tin’iili di cafi mes a bugetarlor ţi fură tăl’iati pot s-crească diznău. Textul: Bogdan Matei Apriduţearea: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International