Radio Romania International

Arhiva :

PÂRADZ TI AGRICULTURÂ
(2007-08-02)
Atea dit soni aspuneari: 2007-08-02 13:01 EET Print
Guvernul ali României va s-ândrupascâ agricultorl’i cari seaminâ culturi di toamnã, deţizia tu aestu sensu, adoptatâ n’iercuri, avânda tu protu scupo scâdearea a efectilor a xeril’ei ţi tâni di multu ş-feaţi zn’ii multu mări. Unâ ahtari xeri nu s-ari faptâ tu Românie di ma multu di 50 di an’i. Suma acutotalui ţi s-da ti subvenţionarea ali motorinâ şi/icâ a biodieselului, a simiţâloru certificati, pesticidilor şi substanţilor ti ngrâşearea a loclui di cari easti ananghi ti culturli di toamnã agiundzi la vârâ 1,32 miliardi di lei, vârâ 440 di miliun’i di euro. Agricultorl’i va u l’ia subventia sum formã di cupoani nai ma amânatu pânâ la 30 di yizmăciun. Valoarea aiştor easti anamisa di 125 pân di 160 di euro pi ictaru, dupu turlia di culturâ, suma maximâ hiinda datâ ti gârnu. Ministrul ali agriculturâ dzâsi câ darea a agiutoarilor easti condiţionatâ di siminarea a culturlor cu simiţâ certificatã ş-di existenţa unâ asiguripseari ti aţea culturâ. Decebal Traian Remeş: “Va s-câftămu s-nâ hibâ spusi documentili di asiguripseari pânã la data di 15 di yinaru 2008. Ma s-nu facâ asiguripseri la culturi, s- nu seaminâ cu simitâ certificatã ş-ma s-nu tin’iseascâ tehnologiili, va lâ lom nâpoi pâradzl’i”. Elu deadi hâbari ş-câ, pânâ tora furâ pâltiti anvâleri ti zn’iili leri ti zn’iili ţi li feaţi xearea ţi facu acutotalui pisti 163 di miliun’i di lei (pisti 50 di miliun’i di euro) ti unâ suprafaţã di 479.000 di ictări aguditi di xeri, iara pâltearea va s-ducâ ninti dupã ţi va s-hibâ adusi tuti dosarili şi va s-hibâ analizati. Xerea bâgă tu piricl’iu culturili di pi 1,7 miliun’i di ictări ditu aţeali 2,8 miliun’i siminati cu gârnu, sicarâ, ordzu, orzoaicâ ş- rapiţâ. Birichetea di gârnu di estan fu di 2,6 miliun’i di tonuri, di dauã ori ma n’icã di anlu ţi tricu. Reprezentanţâl’i a firmilor di morãrit şi panificaţie dzâsirâ câ aestâ va s-aducâ unâ crişteari a pâhălui la pâni ş-a ş-la pârmâtiili di panificaţie cu 30-40 % pânâ tu işita a anlui. Guvernul apufusi, ama, s-facâ unâ verificari a producãtorloru di pâni, cari nu para pâltescu taxili la statu şi tu perspectiva s-facâ unâ scâdeari a taxăl’ei pi valoarea adăvgatâ la aesti pârmâtii. Aşi cumu âl’i şadi ghini, opoziţia nu putea s-ascapâ ocazia s-aflâ iara câbăţ a Executivlui. Senatorlu social democrat Ilie Sârbu, ma ninti ministru ali agriculturâ, declară câ Uniunea Europeanâ ari di fonduri speciali ti situaţii di fânico ama, adâvgă elu, guvernanţâl’i român’i luyursescu câ himu para avuţ ta s-câftămu agiutoari di Bruxelles. Di alantâ parti Vâryâria, iţina di la sud ali României, deadi hâbari aieri câ va s-caftâ agiutorlu a UE ta s-ascapâ di catandisea greauâ ţi u adusi xerea. Autor: Mihai Rădulescu Armânipsearea: Irina Paris

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International