Radio Romania International

Arhiva :

Kosovo, idyea abordari Bucureşti (26.07.2010)
(2010-07-26)
Atea dit soni aspuneari: 2010-08-16 11:26 EET Print
După darea tru şteari a avizlui consultativ a Curtil’ei Internaţionali di Justiţie, cari agiundzi pi isapea că declaraţia unilaterala di independenţă ali provinţie Kosovo nu călcă ndreptul internaţional, reacţiili fură contradictorii. Di ună parti, cum s-aştipta, Priştina hiritisi apofasea, dimăndăndalui că va s-pitreacă a guvernilor dit aţeali 121 di stati căftarea ti pricunuştearea ufiţială a independenţăl’ei ş-că anlu ţi yini, va s-facă ună căftari di aderari la ONU a năului stat. Kosovo, cu un numir di bănători di 2 miliun’i, dit cari 90% - albanezi, fu pricunuscut di 69 di stati, ntră cari SUA si 22 dit aţeali 27 di stati membri ali UE. La alantă chpită, Belgradlu alăsă tra să s-akicăsească că avizlu a Curtil’ei u feaţi multu ma greauă alumta ti agiundzearea şi amintarea ali ună cearei ndreaptă, di compromis, mutrindalui yinitorlu statut ali provinţie di sudlu ali Sărbie, prezidentul Boris Tadici, spunăndalui, limbid, că văsilia a lui vărnăoară nu va u pricunoască independenţa Kosovo. Avizlu ali justiţie internatională easti maş unlu consultativ, iara tută comunitatea internaţională ari, nica, umuti ti ahurhearea a dialoglui anamisa di Priştina şi Belgrad. Minduită andrupătă ş-di România, cari, prit ministurlu ti Externi, năpoi şi spusi pistusinea tu ună cearei păzărăpsită. Teodor Baconschi: ”Curtea feaţi ună mutrită, ună isapi, maş tu ţi mutreaşti legalitatea a actului propriu-dzăs, tra s-adară ună declaraţie di independenţă, ama nu li mutri consecinţili juridiţi a aiştui, dimi problema mutrindalui legalitatea dupu cari s-timil’iuseaşti un aşi dzăs nău crat. Nâpoi u spun, dimi minduita cunuscută, tu ţi mutreaşti nipricunuştearea a statalitatil’ei Kosovo, pi cari România u spusi totna, tu an’il’i dit soni. Nă spunem umutea că va s-ahurhească dialoglu anamisa di Belgrad şi Priştina, cu scupolu tra s-află ună cearei cari s-hibă simfună cu sinferurli a daulilor părţă ş-cari s-mutrească stabilitatea şi perspectiva europeanâ a regiunil’ei.” Di altă parti, avizlu a Curtil’i Internaţională di Justiţie deadi silă a gaeretil’ei ti pricunuştearea ali autonomie tu niscănti ripubliţ autoproclamati dit spaţiul est european. Easti zborlu ti Transnistria, iu, andicra di Kosovo, conflictul a autorităţlor proaruseşti cu R.Moldova pro-româneascâ ari un haractiru politic ama nu etnic. S-tru România, dupâ hâbarea a Curtil’ei, vrerli ti autonomie a minoritatil’ei maghiară (6,6% dit tuţ bânâtorl’i) loară ună silă. Viţeprezidentul a PE, László Tokés, spusi că maca ună microregiune cata cum Kosovo ş-amintă autonomia, idyiul lucru poati să s-facă ş-tru Tinutlu Secuiesc dit Romania. Declaraţia fu sertu sancţionatâ di clasa politica internâ, cari u luyursi ti niaprucheari nica şi ună atacă la statlu naţional ş-la Constituţie. Textul: Valentin Tigău Apriduţearea: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International