| Reacții românești la Raportul pi justiție ali UE (21/07/10) |
| (2010-07-21) |
| Atea dit soni aspuneari: 2010-08-16 11:25 EET |
Ațel dit soni raportu ali Comisie Europenă mutrindalui catastisea ali justiție româneascâ easti nai ma critic după aderarea la Uniuni. Tu premieră, executivlu comunitar spusi limbid că România nu ș-tiniseasti borgili ți ș-li lo tru oara anda fu aprucheată tru UE. Raportul cutuyurseasti, maxus, naua turlie a nomlui tu ligătură cu Aghenția Națională di Integritati, organismu adrat tra s-veadă averli a demnitarlor. Ași cum spuni Comisia, nomlu ANI tu varianta adoptată di parlamentul român după invalidarea a lui la Curtea Constituțională easti ună mari jglioată tu alumta contra ali arușfeti. Prota lăngoari a nomlui spuni ti eliminarea a posibilitățlor di sancționari a disuiduserlor anamisa di bunurli și amintatițli identificate și, implițit, controlu a averlor amintati tru chirolu anda fură pi ipotisi publică. Aestă dit soni turlie a nomlui fu apufusită, ama, tru aradali niconstituțională, ațea turlie că Parlamentul ari, tora, nădia ta s-lu ndreagă. Easti ațea ți ari umuti și prezidentul Traian Băsescu, apufusit tra s-caftă adunarea a Parlamentului tru sesiuni extraodinară, tra s-da silâ a proteslui leghislativ anda easti zborlu ti Agenția di Integritati. Un altu lucru slab ți lu-află CE easti că autoritățli români nu scoati tu videală și nu sancționeadză aproapea ici ti conflictu di sinferuri și anuleadză multu puțăni licitații publiți ți cari ari șubei tră furlăchi. Cara Direcția Națională Antiarușfeti easti, diznău, alăvdată ti anchetarea a cazurlor di arușfeti pi nivel analtu aliumtrea, instanțili suntu cutuyrsiti ti lucurlu multu ayălisit cu proțesili. Cu tuti slăbinițili cu cari s-ampuliseaști, ma largu, sistemlu judiciar românescu, Comisia Europeană nu zburaști ti eventuali sancțiuni. Purtătorlu di zbor ali Comsie Europenă, Mark Grey, scoasi tu videală publiclu ti urminiili fapti di Comisie și declară că vini oara că autoritățli române să-ș tinisească borgili. Fără să-li contestă corectitudinea tehnică, prezidentul Traian Băsescu nu easti simfun cu raportu ti iholu cabaia politic și formularea, ti cari spusi că nu easti ti aprucheari, dimi că România nu ș-tiniseaști borgili ți ș-li lo anda intră tu UE. Caplu a statlui dimăndă că Bucureștiul va s-ndreagă un raportu a lui ișiș tu ligătură cu catastisea ali justiție românească, pi cari va u pitreacă a statilor membri și ali Comisie Europenă. Di partea a lui, Ministurlu ali justiție, Cătălin Predoiu, nu ș-ascumsi niifharistusearea că regreslu tu ți mutreaști ANI băgă fără ndriptati tu aumbră realizări di simasie, chiro tru cari Procurorlu gheneral, Laura-Codruța Kövesi, u spusi minduearea că analiza ali Comisie easti obiectivă ș-că reformili a sistemlui juridic vor duteari ma largu.
Textul: Ștefan Stoica
Apriduțearea: Tașcu Lala
|
2025-04-03
Print
Puteț s-avdzâț căndțido