Radio Romania International

Arhiva :

ROMÂNIA HIARBI DI CÂLDURÂ
(2007-07-17)
Atea dit soni aspuneari: 2007-07-17 14:30 EET Print
România s-ampuliseaşti stâmâna aestâ , cu unâ nauâ dalgâ di câroari, deftura dupu aţea di la işita a meslu cirişaru, cându murirâ ma multu di 30 di inşii. Meteorologil’i feaţirâ timbihi, ti iamea di chiro di marţâ pânâ dumânicâ, cu codu galbin ti ântreaga vâsilie, iara di gioi cu codu purdicaliu ti Bucureşti şi 9 judeţi dit sud-vestu şi sudu, iu suntu aştiptati temperaturi di 40 di gradi Celsius. Sâptâmâna ţi tricu, guvernul ari adoptatâ, tu premierâ, ti România, un plan naţional anticâroari, tu colaborari cu experţâ franceji a curi vâsilie s-alumtâ aoa şi ândoi an’i cu unâ situatie di idyea turlie, cându murirâ n’il’i di inşii. Nai ma greu tragu mărli aglomerări urbani, cumu easti Bucureştiul, ama ş-alanţâ câsâbadz ţi suntu tu sudlu ali vâsilie. Specialiştil’i spunu câ, tu aesti zoni, organismul uminescu ducheaşti unâ temperaturâ cu 15 di gradi mai mari di aţea hâbârâsitâ, di itia a aerlui ânfârmâcatu s-a asfaltului hertu. Premierlu Călin Popescu Tăriceanu câftă a autorităţlor locali s-cilâstâsească ma multu ş-cu ma mari hâiri ta s-ândreagâ problemili ţi li faţi câroarea. Elu câftă identificarea a categoriilor di persoani cama slabi cari au ananghi di asistenţâ medicalâ şi di pitreaţearea acasâ a mâcaril’ei ş-a apâl’ei. Premierlu câftă tutnâoarâ ş-hibâ asiguripsiti stogurli di yitrii ditu spitali ti intervenţii pi ayunie, climatizarea tu săl’iurli di operaţii şi terapie intensivâ, tu saloanili a lândziţloru croniţ şi tu maternităţi, s-hivâ verificatâ daima calitatea ali apâ ti beari ş-tu zonili iu fântân’ili au sicatâ, icâ aclo iu apa nu mata easti bunâ ti beari s-hibâ asiguripsitâ aprovizionarea. Tăriceanu câftă tutnâoarâ, sâ s-facâ ma multi controali la unităţli cari vindu pârmâtii di origini animalâ. Tu mulţâ câsâbadz dirt Românie, furâ bâgati pi sucăchi, puncti di protu-agiutor şi di ampârtări di apâ fârâ pâradz. Autorităţli bâgarâ restricţii di circulaţie icâ di vitezâ ti urdinarea rutierâ şi feroviarâ. Aşil, tu chiro di câroari, autovehiculili mai mări di 7,5 toni nu mata au izini s-urdinâ anamisa di sihăţli 11 şi 20 pi căl’iurli naţionali. Trenurli, ţi poartâ pârmâtie şi aţeali cu călători va s-urdinâ cama preayalea. Cama vâ spunemu câ temperaturili multu mări dit chirolu ditu soni şi xichea di ploi feaţirâ mări zn’ii ş-tu agriculturâ iu mari parti di biricheti, poami şi dzârdzâvăţ nu mata s-feaţirâ. Autor: Andreea Bojoi Armânipsearea: Irina Paris

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International