Radio Romania International

Arhiva :

Ahurhita a unui nău Pontificat
(2013-03-20)
Atea dit soni aspuneari: 2013-03-20 12:17 EET Print
Pontificatlu al Papa Francisc (76 di an’i), al 266-lea dit isturii, fu yurtusit ofiţial, pi 19 di Marţu, dupu ţi luă înseamnili papali şi adră unâ slujbâ multu fronimâ, solemnâ tu Bazilica „San Pietro” dit Roma. Cu aestâ furn’ii furâ aclo vârâ un milion di pelerin’i şi delegaţii ofiţiali dit cama di130 di vâsâlii, dintrâ cari unâ vinitâ şi dit Romanii. Ti prota oarâ di la Marea Schismă (1054), la aestâ andamusi vini şi un lider religios ortodoxu, Patriarhul Ecumenic al Constantinopolului, Bartolomeu I. Pontificatlu al Francisc s-pari că va s-hibâ şi unlu a premierilor, a lucrilor adrati ti prota oarâ. Ahurhi cu alidzearea a lui la cumundisearea a Bâsearicâl’ei Catolicâ, nâinti cu unâ stâmânâ, lucri ţi fu ti ciudii, câ ţe cardinalu argentinian Jorge Mario Bergoglio, Arhiepiscop di Buenos Aires, nu eara pi lista a “Papabililor”. Ti ciudii fu şi numa cu cari el va s-cumândiseascâ, di tora-nclo, vârâ 1,2 di miliardi di criştin’i dit tutâ lumea. El şi-aleapsi numa di turlii ecleziasticâ “Francisc”, ti aduţearea aminti a Sf. Francisc dit Assisi, cari, tu secolu al XIII-lea, vru s-mutâ disnău Bâsearica, împârţâtâ, atumţea, ama şi tora, şi cari s-alumtă ti ghineaţâ - tu chirolu a Cruciadilor şi ti tin’isirea a naturâl’ei. Easti protlu Papâ iezuit şi protlu Papâ latino-american dit isturii. El yini pi Scamnlu Pontifical dupu Benedict al XVI-lea, cari inşi dit ipotisi tu Şcurtu, ti furn’ii ligati di sânâtatea a lui. Papa Francisc şi-i apruchie, nica unâ oarâ, pelerin’ii ţi furâ la andamusi tu Pâzarea „Sf. Petru”. Cu niham arâs, el „ghinui” dun’iaua adunatâ aclo, şi dapoaia dipusi dit papamobil şi s-priimnâ printrâ tuţ pelerin’ii. Tu zboarâli a lui, prit cari furâ stabiliti direcţiili a năului pontificat, al 266-lea Papâ dit isturii adusi aminti cât easti di importantu ca Bâsearica s-hibâ aclo ti oamin’i şi cât faţi s-nâ apruchiem di aţei cama niavuţ, di aţei şi suntu auşi şi di aţei cari " suntu di multi ori nafoarâ dit inima a noastâ”. .Papa Francisc: „Nu ari câ ţe s-vâ hibâ fricâ s-hiţ oamin’i bun’i! Ama lipseaşti s-u mutrim lumea, s-avem angâtan di cathi om, cu vreari, maxus di ficiuriţ şi di auşi, aţei şi suntu nai ma niputuţ.” Năulu Suveran Pontif zburâ şi ti aţei ţi suntu responsabili tu şi mutreaşti politica şi icunumia – lâ spusi s-nu mai alasâ ca lâiaţa şi moartea s-cumândiseascâ lumea. La andamusea di ahurhitâ a Pontificatlui, Romania fu reprezentatâ di prezidentul Traian Băsescu şi di ministrul di Externi, Titus Corlăţean. Dupu aestâ andamusi, caplu a statlui român şi Papa Francisc deadirâ mâna şi zburârâ niheamâ. Prezidentul îi pitricu a năului Suveran Pontif un zbor dit partea romano-catolicilor, a greco-catolicilor şi a ortodocşilor dit Românii, cari îi oarâ lucru ambar tu borgea ţi îi fu datâ. Papa Francisc, îi dzâsi a prezidentului s-facâ şi plâcârii ti sucţelu a pontificatlui a lui.

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International