Radio Romania International

Arhiva :

Criza guvernamentalâ di Chişinău
(2013-03-06)
Atea dit soni aspuneari: 2013-03-06 10:57 EET Print
Criza dit Alianţa ti Integrari Europeanâ, agravatâ di gesturi ostii întrâ parteneri, dusi la câdearea a cabinetlui cumândisit di liberal-democratlu Vlad Filat. Prit bâgarea tu practico ali moţiuni di cenzurâ aprobatâ, marţâ, tu Parlament, opoziţia comunistâ detonă bomba pi cari şidea coaliţia la puteari. Efectili dit plan externu s-duchirâ di-unâoarâ. Vlad Filat hâbârisi că executivlu comunitar di Bruxelles amână bitisirea a „pâzâripserilor” cu Chişinălu mutrinda simnarea a achicâsearâl’ei di suţatâ şi crearea a zonâl’ei di libir schimbu. Înaltul Reprezentantu ti Afaceri Externi şi Politica di Securitati, Catherine Ashton, şi comisarlu ti extinderi, Ştefan Fulle, câftarâ a forţilor politiţi s-yinâ disnău la moaubeţ şi s-adarâ unâ majoritati stabilâ, cari s-ţânâ vâsâlia pi calea a reformilor şi ali integrari europeanâ. Instabilitatea cari poati s-dânâseascâ icâ s-deviadzâ Moldova di la aestâ cali da gaileadz şi ali Românii. Bucureştiul – dzâsi ministrul di Externi, Titus Corlăţean – bagâ timeil’u pi borgea a politicienilor di Chişinău. Chirolu easti unlu greu şi ş-aduţi cu aţel dit 1999, cându comunişţâl’ii vinirâ la puteari. Cu ei la cumândiseari ti 8 an’i, aţea di nâinti republicâ sovieticâ majoritar românofonâ nu mutri ici câtâ democraţii, niţi câtâ statlu di îndreptu şi niţi câtâ icunumia capitalistâ. Easti multu importantu, tora – spun tuţ analişţâl’ii – sâ s-agiungâ la unâ achicâseari întrâ aţeali trei componenti politiţi ali Alianţâ ti Integrari Europeanâ. Tu absenţa a unâl’ei ahtari achicâseari, alidzerli anticipati nu pot s-hibâ dânâsiti, iara aestu lucru poati s-hibâ nai ma laia îndridzari ti Moldova, tu minduita a directorlui a Institutlui di Ştiinţe Politiţi şi Relaţii Internaţionali ali Academii Români, Dan Dungaciu): „Maca va s-hibâ alidzeri anticipati, io spun că veninlu ţi lu ari tora Alianţa ti Integrari Europeanâ, la cari va s-adunâ şi tensiun’ili multu mări, ahurhiti di campania electoralâ şi muniţia pi cari comunişţâl’ii u au, prit ghinicânâscutili stenogrami icâ interceptări pi telefon, pi cari comunişţâl’ii va li ufiliseascâ şi cari-l mutrescu pi premierlu Vlad Filat, va s-da cali la unâ atmosferâ cari nu va s-poatâ s-îndreagâ Alianţa ti Integrari Europeanâ. Comunişţâl’ii s-poati s-adarâ unâ suţatâ, deadun cu nâscânţâ, ama nu cu Partidlu Liberal, cari canâoarâ nu va s-ducâ cu ei tu vârâ suşatâ”. Unâ alianţâ cu comunişţâl’ii easti, pi di altâ parti, nai ma lailu scenariu, dzâţi Dan Dungaciu. Tu clea’i geopoliticâ, pistipseaşti el, ţi s-feaţi Chişinău easti unâ amintari limpidi ali Federaţii Rusâ contra UE, iara aestu lucru lipseaşti s-bagâ pi minduitâ.

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International