| Criștearea a pensiilor tu mesea ali furtunâ politicâ |
| (2007-07-05) |
| Atea dit soni aspuneari: 2007-07-05 13:41 EET |
Hâbârâsita crișteari sânâtoasâ pensiilor âlj bagâ diznou pi poziții di contra pi prezidentul și premierlu ali Românie. Prezidentul Traian Băsescu luyurseaști câ angajamentili loati tu aestu cazu suntu nirealisti și fați timbihi câ nu va lu promulgâ nomlu ninti s-lia asiguripseri câ Fondul Național di Pensii nu va s-intrâ tu colaps la ișita a anlui ți yini. Traian Băsescu:
"Prințipalul a meu obiectiv easti câ aeastu nomu s-hibâ aplicabilu, ânchisinda di la premisa că easti ananghi absolută ca a pensionerilor s-lâ creascâ pensiili. Ți nu voiu sâ s-facâ, aaama, easti ufilisearea a unui nomu cari dapoia sâ s-veadâ câ fu unâ arâdeari electoralâ."
Tu consecințâ, șeflu a statlui câftă a executivlui să spunâ limbid a cetățeniloru di iu va s-lia pâradzli ti aesti crișteri ahâtu mări: 50%, di la 1 di yimâciun, ti pensiili ditu agriculturâ și 43%, anlu ți yini, pentru pensiili ditu sistemlu public.
Tu aradha a lui premierlu Călin Popescu Tăriceanu dzâți câ nu va lu-alasâ nanaparti proiectul di crișteari a pensiilor și da asiguripseri că aestâ nu va va s-u agudeascâ stabilitatea icunomicâ și niți investițiili tu dumeni claie, cumu educația și sânâtatea. "Guvernul ândreapsi substanța icunomicâ di cari easti ananghi ași câ s-poatâ s-u ampartâ prucuchia bunastarea. Vremu s- asiguripsimu a pensionerilor unâ banâ di minimâ decențâ; cu câtu va s-creascâ icunumia și posibilitățli di majorari va s-hibâ ma mări. Un partid liberal tu unâ vâsilie europeanâ modernâ guvernează nu maș ti emburi, câ ti tuti categoriili sociali. Criștearea a pensiilor nu easti unâ misură di stânga", dzâți premierlu. Cu documenti pi measâ, ministrul ali Icunumie ș-a Finanților, Varujan Vosganian, li ndrupaști spusili alu Tăriceanu și prețizeazâ câ sursili di finanțari ti criștearea a pensiilor s-timiliusescu pi criștearea PIB, a numirului di lucrâtori și a tiniiloru a lucrâtorloru. Ași, vârâ 1,2 miliardi euro va s-yinâ dit majorarea a PIB, luyursitu s-creascâ cu 6,3% anlu ți yini. Iara numirlu di lucrâtori va s-creascâ tu 2008 cu nai puțân 2%, ș-va s-aducâ amintaticu suplimentar la bugetu di 180 - 200 di miliuni di euro. Singurili sumi transferati di la bugetlu di statu va s-hibâ dit TVA și accize, aesti hiindalui luyursiti la unâ valoari di 400-500 miliuni di euro. Vosganian cama spuni că Guvernul nu excludi niți posibilitatea ti unâ altâ majorari, maca bugetlu va s-da izini. Tu idyiul chiro, tu meslu yizmâciunu ministrul va s-prezintâ unâ variantă bugetară pi trei ani, cari pruveadi criștearea a punctului di pensii până la 45 la sută ditu tinia di mesi brutâ pi icunumie, până tu 2010.
Autor: Corina Cristea
Armânipsearea: Irina Paris
|
2025-04-03
Print
Puteț s-avdzâț căndțido