| Plan di sirțăle |
| (2010-05-31) |
| Atea dit soni aspuneari: 2010-06-23 17:40 EET |
Guvernul ali Românie pitricu a Parlamentului di București dauă proiecti di nom ți au scupolu ta să-lu bagă pi cicioari bugetlu național ți ari znie di furnia ali criză economică și financiară globală. Cabinetlu a premierlui Emil Boc ș-lia, aestă turlie, borgea ti nomurli ți li adră, cu riscul ta s-iasă di la guvernari, ma s-hibă di eali nu va s-hibă votati di leghislativ. Premierlu deadi asiguripseri că meatrili di sirțăle spusi tu ațeali dauă proiecti au caractiru temporar, em nicșurarea cu 25% a tiniilor di cafi mes em nicșurarea cu 15 % a pensiilor ți va s-hibă băgati tu lucru maș pănă la 31 di andreu 2010. Ași cum spuni caplu a Executivlui, aesti ndrepturi va s-hibă criscuuti tru 2011, tu condițiili tu cari, pănă atumțea, va s-facă ună restructurari tu aparatlu bugetar. Emil Boc :TRACK Lom aesti meatri di sirțăle tra s-nă asiguripsim, prota ș-prota, că s-finanțeadză ixichea ți u avem, di 6,8, și putem s-păltim borgili a statlui tu limita a aiștei ixichi. Deftura, alasăm un spațiu fiscal ti andruparea ali activitati economică di investiți cari s-aducă, ma largu, locuri di lucru și s-ndreagă premisili a criștearilei economică a văsiliilei. Cripat ti furnia că nu ari duri păradz, guvernul cilăstăseaști , di ună parti tra s-da apandisi la căftărli a FMI și ali UE cari condiționară că va s-da ună nauă parti di mpărmut di aproapea 20 miliardi di euro ma s-lia niscănti apofasi di sirțăle; di altă parti, el caftă, tu săhatea a 12-țea, s-nicșureadză evaziunea fiscală, ună di protili furnii ali ixichi bugetară. Dumănică, Executivlu lo apofasea prit cari țănearea ică vindearea ti cama di 10.000 di țigareti ică ma multu di 200 di kiladz di biutură spirtoasă fară s-hibă marcati s-hibă pidipsită cu ahapsi di la 1 la 4 ani. Tutunăoară, guvernul va s-impoziteadză produsili di luxu, cata cum iahturi, parfumuri, chealea, armatli di chiniyi și giuvaericadzlI. Ufițiali di la BNR spusiră că apofasili di sirțăle suntu idyealui cata cum intervențiili a pompierlor la incendii/focurli izolati, luyursindalui că apofasili anticriză lipseaști s-acață tu isapi, prota ș-prota, năi investiții. Opozitia parlamentara dimăndă că nu va li voteadză ațeali dauă nomuri și va s-bagă ună moțiuni di cenzură ți poati s-ducă la surparea a guvernului. Sindicatili ahurhiră ună dalgă di acțiuni di protestu, ca apandisi la meatrili nipopulari ți li lo guvernul. Cama di ună miliuni di bugetari dit ma multi dumenii intră tu grevă, aestă stămănă. Nai ma mulță suntu profesori, funcționari publiț și cadri sanitari, andrupăț di alti categorii di personal, cata cum lucrătorlI di la metrou și dit transportul public.
Textul: Valentin Tigău
Apriduțearea: Tașcu Lala
|
2025-04-03
Print
Puteț s-avdzâț căndțido