| Cum și câ țe criscu Parlamentul ali Românii? |
| (2012-12-12) |
| Atea dit soni aspuneari: 2012-12-20 13:05 EET |
Cum și câ țe criscu Parlamentul ali Românii?
Alidzerli leghislativi di dumânicâ suntu pi bitisitâ. BEC dzâsi rezultatlu definitiv a scrutinlui, cari va s-hibâ nom unâoarâ cu publicarea a lui tu Monitorlu Oficial. Moaubețli mutrinda mult zburâtlu sistem di vot imnâ deadun cu scenariili ți mutrescu adrarea a yinitorlui Guvern. Aestâ câ țe sistemlu di tora, uninominal și proporțional, ari la bazâ un greu algoritmu și însemneadzâ ahât darea di mandati aților ți amintarâ colegiili tu cari candidarâ, ama și redistribuiri. Chiola s-candidă tu 452 di colegii uninominali, s-da mandati și aților ți inșirâ pi doilu icâ treilu loc, prit un sistem ți țâni cont di numirlu di voturi primiti di formațiunili a lor la nivel giudețean și național. Așiți că, deputaț icâ senatori cu un numir nic di voturi agiungu tu Parlament.Gioclu a mandatilor adarâ, tu idyul chiro, s-creascâ numirlu a parlamentarilor, tu naua leghislaturâ, di la 470 la 588. Așiți, leghislativlu român easti tora cama populat andicra di Congreslu SUA. USL, ți amintă alidzerli, va s-lia 395 di mandati, ARD, marli partid ți chiru baia voturi - 80 , PP-DD, surpriza a alidzerilor 68, iara UDMR -18. Aestu sistem di vot fu adrat di PSD si PNL, tu 2008, ta-s a da ma multi șansi a liberalilor cari iarau atunțea tu unâ greau catandisi. Și mea că tora, el easti multu bun, sistem salvator ti ARD, pro-prezidențial, cu tuti cutuyurserli adusi inclusiv di caplu a statlui, Traian Basescu. Tu 2009, prezidentul pripusi nicșurarea a numirului di aleși la 300 si adrarea unâ a doilor udadz dit Parlament. Initiativa a lui fu pitricutâ la referendumlu consultativ dit 22 di Brumaru 2009, îndreptu unâoarâ cu protlu tur a alidzerilor prezidentiali. Dapoaia, nu putu sâ s-adarâ unâ majoritati parlamentarâ constitutionalâ cari s-va și s-poatâ s-bagâ tu practico aestâ ideii, votatâ di 77,7% dintrâ români. Ți va s-hibâ? Observatorlii politici suntu multu curghioși maca năili structuri a putearâlei leghislativi și executivi va s-hibâ buni nâinti di inșita a anlui. Uidisit cu Constituția, Parlamentul sâ s-poati s-andamuseascâ pânâ di Cârciun. S-așteaptâ și ca prezidentul s-cliamâ partidili parlamentari ti moaubeț ti scupolu a alidzearâlei a năului premier. S-asteptâ cu mari interes purtata ți va u aibâ Traian Băsescu andicra di nominalizarea a premierlui di tora, soțial-democratlu Victor Ponta, pi cari-l vidzu - pânâ tora - di niapruchiat, ama a curi goalâ candidaturâ u va USL, cari amintă alidzerili di duminicâ.
|
2025-04-03
Print
Puteț s-avdzâț căndțido