Căftarea ţi u feaţi Direcţia Naţională Anticorupţie di giudicari a senatorlui tu catandisea di ancl’isu avea ananghi di 69 di voturi, iara izinea fu amintată la limită. Aestă, acă tuţ fură simfun’i, declarativ, că instanţa giudicătorească easti maş ea axizită ta să spună desi căbatea easti ntimil’iată. Dupu cum spuni DNA, tu chirolu alunar-yismăciun 2009, ti năndauă suti di n’il’i di euro, Voicu s-pari că ari faptă intervenţie pi ningă magistraţ şi şefl’i dit poliţie ta s-agiută doi emburi ţi avea problemi cu justiţia. Moeabeţli ţi li avu Cătălin Voicu telefonic fură interteptati la căftarea a procurorlor, iara ună parti di aesti agiumsiră tu media, di fură caplu di yilipseari a jurnalilor tu dzălili dit soni.

Cara apofasea a senatorlor poati s-hibă luyursită un lucru di normalitati prit cari justiţia easti alăsată ta ş-adară lucurlu, aţea ţi scoati tu migdani seamni di antribari easti stricurarea di informaţii tu presă dit dosari ţi suntu tu lucru – faptă tră cari gruplu PSD dit Senat caftă nica şi ună anchetă. Di altă parti, senatorlu PD-L (la guvernare) Iulian Urban aproachi ndreptul ali mass-media ta s-tipusească informaţii, ama easti cu minduita că lipseaşti s-nu s-agiungă ti s-l’ia apofasi:

“Ună easti să zburăşţă tu public, tu presă, tu mass-media, ti ună transcrieari cari agiumsi aclo pi izvuri di hăbări şi altă easti s-treţ un prag, s-treţ pi păntică asocierea a număl’ei a unlui soţ di a nostu cu ideea di mafiot, s-badz muzică di pi iholu a niscăntor filmi cu mafioţ. Ăestu easti linşaj public”. Sum numa “Voicu nyrăpseaşti istoria tu anticorupţie”, ROMÂNIA LIBERĂ aduţi aminti că “parlamentarl’ii cari votară căftarea ali DNA adusiră tu moeabeti zorea ali opinie publică”.

“Al’iumtrea di purtaticlu di pănă tora, di amănari a cilăstăserlor a procurorlor ta s-bagă sum stepsu politicieni, alepţăl’i apufusiră tu cazlu a senatorlui Cătălin Voicu ti ma puţăn di 48 di sihăţ”, nica nyrăpseaşti jurnalu, ayun’iusearea hiindalui exighisită prit aţea că “ună eventuală amânari vrea s-aducă diznău cutuyurseri ti ambudyiusearea ali justiţie”. EVENIMENTUL ZILEI năpoi aduţi aminti, ama tu ţi catandisi s-agiumsi - “Cătălin Voicu fu la dauă voturi di libirtati”.
Textul: Corina Cristea
Apriduţearea: Tascu Lala