Documentul caftă ahărdzearea naima pţăn 6% dit PIB ti aestă dumeni, depolitizarea a cumănduserlor dit spitali şi a serviţiilor deconcentrati a sistemlui şi scutearea la concursu a posturlor di cumănduseari, ama şi băgarea a personalui medical tu partea superioară a grilăl’ei di salarizari. Liberalii nica căftară bitisearea a pachetăl’ei di serviţii medicali di thimel’iu decontati dit asiguripserli suţiali di sănătati, votarea a unui proiectu di nom mutrindalui prevenţia tu sănătati, programi naţionali tră lăngorli/patologhiile naima importanti şi asiguripsearea di yitrii compensati.

Di arada tu ahtări cazuri, moeabeţli agiungu ta s-hibă ună alăxeari di apandisi şi stepsuri un alantu di politicianismu anamisa di parlamentarl’ii a putearil’ei şi aţel’i ali opoziţie, cafi ună parti cutuyursindalui alăntei că nu adră ici ţiva ti sistemlu sanitar atumţea cîndu eara la puteari. Furn’ie di apandisi serti anamisa di puteari - opoziţie fu şi moţiunea băgată di suţial-democraţ pi tema a tin’iilor di cafi mes, a pensiilor şi a locurlor di lucru, aşi cum cum ies aesti tu minduita, vărtos contestată, a cabinetlui Emil Boc. Semnatarl’ii a documentului mutriră s-căndăsească ministerlu di resortu ta s-ndreagă ntrăoară normili metodologhiţi ti băgarea tu practico corectă şi unitară a nomlui mutrindalui tin’iili di cafi mes unitari.

Suţial-democraţl’ii şi aliaţl’ii a lor conservatori nica căftară abrogarea a niscăntor apofasi prit cari să scot niscănti ndrepturi a pensionarlor. Faptu timbihi prit voturli a parlamentarlor a lor işiş şi di aţeali a aşi-număsiţlor independenţă - alepţă cari demisionară dit PSD şi PNL tra s-andrupască putearea - guvernul tricu cu ghini testul a moţiun’ilor simpli. Zorea naima marea băgată a executivlui easti, ama, di turlie suţială ş-nu politică.

Niifharistusiti că bagarea tu lucru a nomlui mutrindalui tin’iili di cafi mes unitari dusi, tu niscănti catandisi, la n’icşurarea a amintatiţlor, sindicatili deadiră a cabinetlui un chiro di dzaţi dzali ta s-li scoată aesti disuidiseri şi s-află cearei tra să-l’i păltească pi aţel’i cari chirură la tin’ia di cafi mes tu proţl’i meşi a anlui. Tu aestu chiro, sindicaliştil’i va u ţănă ş-ma largu călindarea a protestilor, a curi chipită poati s-hibă agiumtă tu meslu mai, unăoară cu greva ghenerală.

Textul: Ştefan Stoica
Apriduţearea: Taşcu Lala