Bucureştiul ari naetoi ca aestâ monitorizari s-hibâ dânâsitâ, a ma, dzâţi Daniel Morar, prinţipalu amintatic câştig easti că mecanismul di monitorizari feaţi unâ radiografie aproapea exactă a sistemului giudiciar, hiinda un stimul ti reformă. Procurorlu-şef, dzâsi ş-câ prinţipala problemă tu cazurli di mari corupţie easti că aproapea tu tuti dosarli DNA ţi agiunsirâ tu instanţă s-aflâ excepţii di niconstituţionalitate. Tu 2009, aşi s-feaţi tu vârâ 100 di dosari, ironia hiinda că tamam aţel’i ţi li votarâ nomurli, dupu ţi agiumsiră s-lâ si bagâ stepsu, ufilisescu aestâ procedură.

Câftatâ susto di Bruxelles, giudicarea a mărlor furi s-tut amână, inclusiv di itia a numirlyui multu mari di dosari ţi suntu pi rolurli a instanţilor. Procedurli contra al Adrian Năstase, ma ninti premier şi ministru ti politica cu xeanili, a curi âl’i si bagă stepsu câ lo aruşfeti, ahurhirâ di aoa ş- 5 an’i. Tut aşi şi dosarlu “Valiza”, tu cari finanţatorlu ali pareie di fotbal Steaua Bucureşti, Gigi Becali, ţi fu aleptu europarlamentar, easti mutrit ti tentativă di dari di aruşfeti a nâscântor fotbalişti, ţâni di ma multu di un an. Pi di altă parti, spuni Morar, cazurli di aruşfeti easti zori s-hibâ probati, cât câbati au doi inşii un cari da mită şi altu cari l’ia aruşfeti şi niţi un di aţel’i stipsiţ nu ari intereslu s-u spunâ fapta penală.

Tu aesti condiţii, procurorlu ari ananghi di interceptări, apândâseaşti procurorlu-şef a critiţlor ali Direcţie Naţionalâ Antiaruşfeti, cari dzâc că majoritatea a probilor ufilisiti yin dit ascultări telefoniţi. Aşi easti şi tu cazlu cari ţânie, tu dzâlili dit soni, caplu di afiş a hâbărlor dit Românie – aţel a senatorului Cătălin Voicu. Aleptu pi listili PSD şi vehiculat ca posibil ministru di Interni aoa ş-un an, al Voicu âl’i si bagâ stepsu di trafic di influenţă, inclusiv tu giustiţie, ti ma mulţâ emburi.

Tu premieră, DNA câftâ âncl’isearea a unui parlamentar, tu dosarlu Voicu hiinda adusi ca probi stenogrami tu cari suntu tricuti numi di politicien’i dit ma multi partidi, cum şi di maghistraţ. Şi tut la capitollu premieri pot s-hibâ spusi manifestărli, distincti, di solidaritati cu doi primari – Antonie Solomon, PD-L (la guvernari) şi Cristian Anghel, PNL, opoziţia di dreapta. Protlu, a curi âl’i si bagâ stepsu luari di aruşfeti şi fals intelectual, defturlu, la doi an’i şi giumitati di ahapsi ti aruşfeti, puturâ s-facâ aţea ţi tu Românie aproapea maş pareili di fotbal pot s-facâ – să scoată pi sucăchi n’il’i di susţinători.

Autor: Corina Cristea
Apriduţearea: Irina Paris