Radio Romania International

Arhiva :

Media Top
(2010-03-20)
Atea dit soni aspuneari: 2010-03-22 13:28 EET Print
Criza economică şi financiară cari agudi tută lumea ahurheaşti ta şi scoată cărinţăl’i tut ma anturyisiţ tu România, iara tabloulu cari iasi tu lun’ină easti tut ma urut. Premierlu Emil Boc căftă a sindicatilor s-achicăsească că ali Românie nu-l’i da di mână ta s-tragă napoi di la nomurli a tin’iilor di cafi mes şi a pensiilor, ţi suntu ananghi ti reformarea a statlui. El feaţi timbihi că, ma s-facă al’iumtrea, hărgili publiţi va s-ascapă di sum avigl’iari, iara România va s-agiungă tu ună catandisi economicã greauă, idyealui cum aţea ali Gărţie. Boc feaţi timbihi că, ma s-hibă di nu s-ufilisescu prota ş-prota păradzl’i publiţ ti investiţii şi adrarea di locuri di lucru, România nu va s-aprăftăsească, pi chiro di mesi ş-lungu, s-ţănă cheptu a provocărlor. Greva românească, sora ma n’ică a aţil’ei gărţeşţă, faţi timbihi EVENIMENTUL ZILEI, cari anyrăpseaşti că, acă suntu căndăsiţ că nu va s-aprăftăsească să scoata pi căl’iuri ndauă miliun’i di oamin’i, sindicaliştil’i fuvirsescu guvernul cu ambudyiusearea a lucurlui la tut sistemlu bugetar. Publicaţia exighiseaşti că protestatarl’ii suntu niifharistusiţ di turlia tu cari s-bagă tu lucru nomlu unic tră tin’iili di cafi mes, cari dusi la n’icşurări la tin’iili di cafi mes ti ma multi categorii di lucrători a statlui, ama şi di proiectul a năului nom a pensiilor. EVENIMENTUL ZILEI dimănda, tutunăoară, ti greva di Bucureşti a lucrătorlor di la metrou şi mitinglu a transportatorlor cari scot tu migdani evaziunea fiscală dit dumeni. Stămăna a protestilor, faţi timbihi, tu arada a lui, JURNALUL NATIONAL. Aestă ahurheaşti cu mitinguri şi pichetări tru tută văsilia ndreapti di Federaţia a Sindicatilor Liberi dit inviţămintu, niifharistusită ti nipăltearea a ndrepturlor tră tin’iili di cafi mes amintati tu instanţă şi disponibilizărli di la toamnă. Dupu cum spuni JURNALU NATIONAL, dascal’ii fuvirsescu că va s-ambudyiusească anlu şcolar, cara nu va lă si da apandisi la căftărli a lor. Jurnalu nica anyrăpseaşti că stămăna aestă ies pit căl’iuri şi pensionarl’ii, cari caftă criştearea a punctului di pensie la 45% dit tin’ia di cafi mes di mesi pi economie. GUVERNUL nă pitreaţi pensii privati, nyrăpseaşti GANDUL, cari u spuni căndăsearea a ministrului ali Economie, Adriean Videanu, ţi cundil’adză că român’il’i cu tin’iili di cafi mes mări ş-cari vor pensii dupu aţea ţi lă si cadi nu lipseaşti s-mutrească la bugetlu a statlui, că maş la fondurli di pensii privati. Publicaţia agiundzi pi isapea că pi un lucrător di 35 di an’i lu aşteaptă nica 30 di an’i di lucru, după cari statlu l’iasiguripseaşti alţă ndoi an’i di foamiti instituţionalizată. Textul: Leyla Cheamil Apridutearea: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International