Anaparti di vrearea ma veacl’e a Bucureştiului ta s-ancupârâ dit Kazahstan – nai ma marli producător di uraniu pi nivel mondial - combustibil ţi easti ananghi ti lyucurlu a reactoarilor nucleari di Cernavodă (sud-estu), un scupo declarat ali vizită fu scularea-a sinferlui ti aestu stat tră proiectul trilateral Azerbaidjan-Georgia-România, mutrindalui purtarea a naftăl’ei şi a gazilor naturali cătâ Europa. Di aestâ dumeni s-leagă, dimi, nai ma importantă investiţie a unâl’ei companii dit Kazahstan tu România, KazMunaiGas ţi ancupără tu treil’i an’i dit soni tuti acţiun’ili Rompetrol.

După andamusea, di Astana, cu caplu a statlui român, prezidentul kazah, Nursultan Nazarbaev, adusi aminti că România easti un partener economic importantu a vâsiliil’ei a lui tu Europa Centrală şi dit Apiritâ şi câlisi companiili româneşti s-l’ia parti la dezvoltarea industrială a Kazahstanlui. Nursultan Nazarbaev:

“Kazahstanlu easti hâzâri s-lucreadzâ deadun cu vâsilia a voastâ pi ma multi comati, di la dumenea energheticâ, la aţea comercialâ şi tutunâoarâ, tu planlu di dizvultari industrială a Kazahstanului, şi ia vini oara ta s-călisim companiili a voasti ta s-l’ia parti la aestu proţes”.

Dizvultarea a ligăturlor di dauli părţâ easti hâirlâticâ ti dauli stati, spusi prezidentul Traian Băsescu, ma adusi aminti că România poati s-hibâ aţel crat ţi poati s-ufiliseascâ yişterli energhetiţi dit Kazahstan, ama şi un partener ti dizvultarea industrială a aiştei văsilie. Traian Băsescu:

“România achicăseaşti pân tu cap ananghea a Kazahstanlui ta ş-dişcl’idâ posibilităţli di exportu cătâ marea pâzari ali UE, unâ pâzari di 500 di miliun’i di cetăţen’i.

Ti aţea, parteneriatlu ţi lu ndridzem cu Kazahstanlu – ufilisearea ali infrastructură românească, s-hibâ câ zburâm ti portul Constanţa, di sistemlu feroviar, di sistemlu rutier icâ, nica ş-ma multu, di arâulu Duna, ţi treaţi dit un cap tu alantu prit locurli ali UE, di s-leagâ cu Amarea Lae prit Rin, cu Amarea a Nordului prit Rin – easti unâ cearei ti intrarea a pârmâtiilor dit Kazahstan cătâ UE”. Karaganda, iu s-andâmusi cu reprezentanţâl’i a comunitatil’ei românească, Traian Băsescu tâxi că Bucureştiul va s-pitreacâ cadri speţializati tu limba română ta s-adrâ unâ sculie di dumânica pi ninga ambasada ali Românie. Di altă parti, caplu a statlui vizită, Spassk, monumentul adrat ti tin’ia a aţilor di 900 di prizonieri român’i ş-cama, dit chirolu a doilui polim mondial ş-ti aţel’i ţi trapsirâ cu furn’ia a fuvirserlor comunisti.(04.03.2010)

Textul: Corina Cristea
Apriduţearea: Taşcu Lala