“Lipseaşti s-aflaţ mecanismul prit cari firmili cari cu ndriptati lucreadză cu tin’isearea a nomlui şi păltescu borgili la stat, ama di furn’ia a niscăntor mecanismi, pi cari voi li ştiţ nai ma ghini, nu l’ia păradzl’i di la stat, nu pot s-intrâ tu falimentu şi maxus tu un chiro di criză. Vă caftu s-minduiţ ti aestu mecanismu şi s-aveţ tu minti unâ ahtari catandisi, cari niţi economic, niţi moral nu easti tin’isită”. Tu arada a lui, ministurlu a Finanţilor, Sebastian Vlădescu, să spusi niifharistusit di lucurlu a instituţiil’ei ti curmarea a evaziunil’ei fiscali, aţea ţi poati s-da izini ti ieşearea ali Românie dit criză.

El luyurseaşti că evaziunea fiscală poati s-hibă curmată prit unâ acţiuni multu ma sertâ a lucrătorlor ANAF şi prit lucurlu deadun faptu cu poliţia, justiţia şi serviţiili di informaţii. Sebastian Vlădescu:

“România ari ananghi di investiţii. România ari ananghi ta ş-creascâ hărgili di capital. Ama s-minduiţ şi aestă, ţi va s-dzăcă, cafi un proţentu dit PIB cari s-cheari di furn’ia a evaziunil’ei fiscali va u spună şi aestă că va s-aibă ma pţăni căl’iuri, pensii ma n’iţ, alocaţii ma n’iţ, sânâtati ma puţânâ ti cetăţen’il’i român’i”. Di altâ parti, guvernatorlu a Băncâl’ei Naţionalâ a Romaniil’ei, Mugur Isărescu, luyurseaşti câ di furn’ia a ixichil’ei la bugetlu di pensii, cari adună tuti disponibilităţli dit bugetlu centralizat, tu România nu pot s-hibâ adrati autostrădz. Mugur Isărescu:

„Problema alithea easti icâ pensii, icâ autostrădz, câţe nu ai cum s-adari autostrădzli cu unâ ixichi tu bugetlu di pensii cari s-ţă adunâ tuti disponibilităţli dit bugetlu centralizat. Tu România nica nu avem fonduri di pensii funcţionali. Tu România nica ari bugeti di pensii, şi ta s-nu agiungă tu ixichi cu bugetili di pensii, lipseaşti ta s-ai un un numir di contribuabili, ţi s-hibă duri, icâ unâ contribuţie la pensie ţi s-hibă tu unâ scară analtâ”. Isărescu feaţi timbihi că maca ari vrearea ti triţearea la moneda unică europenă tu 2015, Bucureştiul lipseaşti s-n’icşureadzâ ixichea bugetară la 3%, iara tu aesti condiţii nu mata pot s-hibâ adrati autostrădz. Guvernatorlu BNR nica spusi că situaţia economică ali Românie după ţi numata va s-aibă agiutor financiar di la FMI va s-agiungă tu ună catandisi ma buna.(T.L. 03.03.2010)

Textul: Daniela Stefanescu
Apriduţearea: Taşcu Lala