Văsiliili a reghiunil’ei suntu oarfâni tu resursi şi ţânu di importurli di gaz şi naftâ dit Rusia. Calea nai ma bună ti işearea dit aestâ dependenţâ easti adrarea ntrâoarâ ali conductâ Nabucco – alternativă la gazlu arusescu şi unâ variantă prit cari gazlu ţentral-asiatic poati s-agiungâ tu Europa - spusi directorlu gheneral ali Aghenţie Internaţionali tră Energhie Atomică, Tanaka Nobuo, câlisitu la andamusea di Budapesta. Dus ş-nâsu tu capitala ali Ungarie, premierlu român, Emil Boc, spusi câ apofasea a statilor ţentral-europeni ta sâ u ducâ ma largu politica energhetică unitară ari tu scupo ta s-nu s-agiungâ la crizili di turlia a aţil’ei ţi inşi tu migdani tu ahurhita a anlui 2009, cându divergenţili aruso-ucraineani ambudyiusirâ, ti şcurtu chiro, vinderli di gaz arusescu câtâ Europa.

Statili dit zonă aşteaptă bâgarea tu lucru a reglementărlor ligati di rezervili di siguranţă di gaz. Aesti va s-asiguripseascâ, întră altili, intervenţia ali Uniuni Europenâ tu catandisili tu cari pâzarea nu va s-hibâ axi s-chiverniseascâ maş ea goalâ disuiduseri tu ţi mutreaşti vinderli. Nabucco armâni protlu scupo ali Românie, cundil’e, di altă parti, primlu – ministru Emil Boc. El nu trapsi mânâ s-nu spunâ, ama câ acaţâ sâ s-facâ moeabeti ti iţi iniţiativâ cari poati s-anvârtuşeadzâ securitatea energhetică a vâsiliil’ei. Tora ma ninti, ghigantul arusescu Gazprom câlisi România s-l’ia parti la proiectul a gazoductului South Stream, dizvultat deadun cu compania italiană Eni şi luyursit un concurentu al Nabucco.

Compania arusă nica pripusi a autorităţlor români s-lucreadzâ deadun tu dumenea a exploraril’ei deadun cu zăcămintili dit Irak, Azerbaidjan, Turkmenistan nica şi dit Federaţia Rusă. Părţâli nica acâţarâ tu moeabeti câbilea ti importul directu di gazi aruseşti – variantă hâirlâticâ financiar tră România – cum şi construcţia a niscântor mâyâzii di gaz pi teritoriul a vâsiliil’ei. Ari boţ cari spun că unâ bâgari tu practico a proiectilor zburâti di Moscova şi Bucureşti poati s-ducâ la scădearea a pâhălui pâltit di România tră gazlu arusescu. Tu marţu, România ahurheaşti pâzârâpserli cu Gazprom tră simnarea a unlui nău contractu di purtari a gazilor naturali cătră zona balcanică.(25.02.2010)

Textul: Ştefan Stoica
Apriduţearea: Taşcu Lala