Easti zborlu ti Marli Premiu a Juriului, Ursa di Asimi, şi Premiul "Alfred Bauer", ţi s-da ti aduţearea aminti a thimiljiusitorlui ali Berlinală, ti năi perspectivi tu arta ţinematografică. Distincţiili li deadi cunuscuta actriţă Renée Zellweger. La conferinţa di presă ţi s-ţănu dupu festivitatea di premieri, proaspitlu amintâtor, Florin Şerban, să spusi ciudusit şi cu harauâ hârâcop di hăirlăticlu a filmului a lui, cundil’indalui că fu un riscu ţi ş-lu lo, em el ca regizor, căţe lucră cu ună distribuţie cari acâţă tu isapi ma mulţă actori niprofesionişti, em ş-producătorl’ii. Florin Şerban:
” Şteam cã avem un filmu bun, ama tu antriţeari easti ca atumţea cându inţră pi terenlu di fotbal: ai pistusini tu tini, ama nu ştii cum va să spuna axia adversarlu. Easti ună surprizã ti mini, ti noi. Ună muşeată surprizã”.

Pelicula spuni pirmthlu a unui tinir dit ună hăpsani cari s-ariseaşti cu ună studentă deapoa ş-bagă tu minti ta s-fugă cu ndauă dzăli ninti ta să-lu siligheascâ. Filmul fu alăvdat di presa internaţionalã. Aţel’i di la The Guardian spusiră ti filmu că easti ”un givaerico un asimico di debut tu lungmetraj’’, iara a deapoa The Hollywood Reporter spunea că easti “un filmu ahoryea”, cari arucă ună mutrită maxus pi delincvenţa juvenilă dit România, lo Marli Premiu a Juriului, la ediţia di tora ali Berlinală, doilu festival di filmu european ca importanţă dupã Cannes.

Succeslu Hăirlăticlu a românlui easti cu ahât ma mari cu cât "s-bãtu" tu antriţeari cu regizori ti anami, cumcata cum Roman Polanski, Oskar Roehler, Benjamin Heisenberg, Rob Epstein ică Jeffrey Friedman. Producãtorlu a filmului, Daniel Mitulescu, spusi că pelicula fu ună hăirlătică tu ţi mutreaşti distribuţia, “Io cându voi s-aşuir, aşuir” "Eu când vreau sã fluier, fluier", hiindalui vindut tu 15 di stati, ntră cari Spania, Olanda, Belgia, Israel. Tu România va s-poatâ s-hibâ vidzut ahurhindalui cu meslu marţu.

Aestă nu easti singura hăirlătică românească la ediţia 2010 ali Berlinală, că ţe şcurtu-metrajlu "Colivia" a regizorlui Adrian Sitaru fu tin’isitu cu premiul a Serviciului German tră Alăxeri Academiţi, iara Dragoş Bucur s-arădăpsi anamisa di aţel’i dzaţi tiniri actori europen’i tin’isiţ cu titlul di “Steali cu nădii ti amintari”/ Stele in devenire (Shooting Stars). După hăirlâticlu amintat la Berlinală, Florin Şerban intră pi lista a regizorlor roman’i di succţes, cari tu an’il’i dit soni adusiră acasă multi premii di la Festivaluri Internaţionali di Filmu cu anami, deadun cu numi cata cum Cristi Puiu, Corneliu Porumboiu, Cristian Mungiu.(T.L. 02.22.2010)
Textul: Andreea Bojoi
Apridutearea: Taşcu Lala