El deadi a unăl’ei delegaţii arusească, cari vizită România, datili ţi li căftară ti ndridzearea a studiului di fezabilitati cu căbilea ta s-treacă aestu gazoductu prit locurli româneşti. South Stream mutreaşti adrarea a unei conductă di gazi naturali, cu ună axizeari, tut cu tut, di 63 di miliarde metri cubi tru an, dit Rusia cătă Italia şi Austria, cu triţeari prit Amarea Lae anamisa di mardzina arusească şi România ică Vărgăria. Media aruseşti, aleapti di pitricutlu a nostru di Moscova, spusiră că Gazprom easti hăzări ta s-da ali Românie, tu loclu ali Vărgărie, protlu rol tu aestu proiectu, căţe păzărăpserli cu Sofia amănă di ndoi meşi.

Bucureştiul easti, di ma năinti mintit tu proiectul Nabucco, andrupăt di Uniunea Europeană ş-cari pruveadi adrarea a unui gazoductu axizit ta s-licşureadză importul, a gazilor naturali, ndreptu dit reghiunea Caspică şi Asia Centrală, anvărligăndalui Rusia, pi calea Turchia - Vărgăria - România - Ungaria - Austria. Aşi cum spuni ministurlu Videanu:
“România ari ună nădie cabaia mari, căţe tuti proiectili energhetiţi cari suntu pi calea di cătă tu notu, tu aestu chiro, tu aestă zonă a Europăl’ei, trec prit România, aţea ţi easti un lucru multu di multu, di mari simasie şi aduţi un avantaj tu iţi păzărăpseari.”

Ufiţial, em Moscova, em Bruxellesul spun că South Stream şi Nabucco nu sunt concurenti, că maş tu lucru deadun. Ama, aduc aminti experţăl’ii, rolu niufiţial al Nabucco easti tamam aţel ta să u n’icşureadză dependenţa ali Europă di gazili naturali importati dit Rusia, un furnizor tut ma imprevizibil tu an’il’i dit soni. Apruchearea tu lucru deadun a Bucureştiului cu South Stream nu easti isa, ama cu ună asţâri păltărli căţe şi alti stati asociate la Nabucco bătură, tu arada-lă, palma cu aruşl’ii. Analistul economic român Aurelian Dochia s-faţi pişmani, di altă parti că, până tora, Nabucco “nu lo că maş ună andrupari simbolică di partea ali UE, ti cari construcţia a lui nu pare nica s-hibă ca un ţi s-da bană”. Şi cundil’aeadză că “va s-alătusim ma s-nă-ncl’idem opţiun’ile până cându un dit gazoducti nu trec, ş-cama largu, ti ma nclo.”
Textul: Bogdan Matei
Apriduţearea: Taşcu Lala