| Raportul Freedom House ti Romania |
| (2007-06-15) |
| Atea dit soni aspuneari: 2007-06-15 13:37 EET |
Rezultatili amintati prit pidimolu ți-l feațirâ s-umplâ câftărli ali Uniunii Europenâ adusirâ ali Românii ș-Vâryârie scoruri ma buni dati di organizația niguvernamentalâ amiricanâ Freedom House tu raportul mutrinda Națiuniunili tu Tranziție tu 2007. Studiul misurâ cafi anu nivelu ali democrație dit 29 di vâsilii și reghiuni dit Europa Chentrală și Eurasia, iara actuala ediție scoati tu migdani câ, tu condițiili tu cari standardili democratiți scâdzurâ icâ armasirâ idyili tu majoritatea a statilor dit chentrul și estul ali Europâ membri ali Uniuni Europeanâ, tu România și vâryâria catandisea ali democrație s-feați ma bunâ
.
Tu cazlu a Bucureștiului, evoluțiili pozitivi suntu criștearea a independențâlei ali justiție, aduțerea dinintea a completului di giudicatâ a nâscântor cazuri di analtâ corupție și concentrarea a jurnalismului di investigație la lucurlu a guvernului.
Arușfetea armâni unâ problemâ, inclusiv pi nivelu unor oficiali cu ipotisi analti, ama pidimolu di alumtâ contra a fenomenlui s-pari câ s-duți cu ma mari hâiri ca ma ninti. Cama sâ spuni câ Executivlu român fu relativ stabil tu 2006, cu tuti ncâciturli dit coaliția ți easti la puteari, cari și-agiumsi ama principalu obiectiv - aderarea la UE la 1di yinaru 2007.
Organizația luyurseaști câ xichea a unâlei majoritati stabilâ tu Parlamentul di București poati sâ mbduyiuseascâ ama, adoptarea ali leghislație di cari easti ananghi ti duțearea ninti a proteslui di integrari ali Românie tu spațiul comunitar.
Aestâ poati s-ducâ la activarea a clauzâlei di salvgardari pruvidzutâ tu Tratatlu di aderari, stâmusinda pricunuștearea a dețiziilor a nâscântor instanți românești tu UE.
Tu idyiul chiro, luânda tu isapi capacitatea administrativă scădzută, pari probabil ca fondurli europeani ândreapti ti România tu 2007 s- nu hibâ hârgiuiti. Tu aesti condiții, contribuția ali vâsilie la bugetlu UE, ca statu membru, va s-hibâ ma mari di fondurli ți li lia di aclo. Pi di altâ parti, România lu adră ma bunu nomlu ti finanțarea a partidilor politiți și a campaniilor electorali prit mecanismi di control cama buni, bagâ oarâ Freedom House, adăvgânda că fu adoptată și leghislația mutrinda protili alidzeri europeni, programati ti 2007.
Anamisa di concluzii easti și ațea câ tu 2006, presa fu multu activâ, ama fu înreghistrată unâ crișteari a nivellui di concentrari a nicuchirlor pisti mass-media. Cu tuti aesti, critițli la adresa a guvernului și a prezidentului furâ libire. Tutnâoarâ, cu tutâ concentrarea a controllui, nali căliuri di informari s-au dezvoltatâ multu di multu anu, avânda ca rezultat criștearea a numirlui di sursi media dit Românie.
Autor: Corina Cristea
Armânipsearea: Irina Paris
|
2025-04-03
Print
Puteț s-avdzâț căndțido