El aduţi stepsu că, di la sistemlu di selecţie a participanţălor la congres până la loclu di dizvărteari a aiştui, tuti suntu ndreapti aţea turlie că liderlu di tora, prezidentul a Senatlui, Mircea Geoană, s-armănă pi idyea ipotisi. Năstase spusi că nu ari naeti tra s-leghitimeadză ună antriţeari tu cari nu mata pistipseaşti:

“Apufusiiu s-nu candidedzu, căţe nu mata voi ta s-escu un figurantu, tu un sţenariu cari easti şi alătusitu anyrăpsitu şi, după minduita a mea, duţi la niscănti cearei alătusiti.” Ritrădzearea al Năstase dişcl’idi calea ti un dit partizan’il’i a lui, viţeprezidentul Victor Ponta, cari, ma ş-dimăndă candidatura, pricănăscu că aestă apofasi u dukeaşti ca ună cearei di avarie, căţe nu ş-avea băgată tu minti ta s-intră tu antriţeari.

Ca un ţi eara ma ninti caplu ali organizaţie di juniori a PSD şi un di nai ma tinirl’i ex-miniştri di na’stânga, Ponta nu ari ixichi di ună combativitate cari a adepţlor lă pari că la da vimtu, la aduţi adil’aticlu, a deapoa a adversarlor maş că-l’i enerveadză. Va-l’i hibă cum ţi s-hibă greu că pi aţea dit soni sută di meatri s-agiungă ta ş-adară ună parei cu nădii di victorie. Căţe tu Comitetlu Executiv, oamin’il’i al Geoană aprăftăsiră s-bagă cu furteaţă ti congres şi votlu pi listi, haristusită a curi amintătorlu l’ia tuti: yinitorlu prezidentu va-l’i tragă şi aţel’i 15 viţeprezidenţă, şi prim-viţeprezidentul, şi secretarlu gheneral. Jurnalu GÂNDUL agiundzi pi isapea că “Geoană amintă” avanpremiera-a congreslui.

La bursa-a pariurlor, di altă parti, aestu easti tut ma multu acăţat tu isapi cu nădii, căţe, pi ningă foştil’i miniştri Miron Mitrea şi Cristian Diaconescu, pi lista-a contracandidaţlor s-vedu len turlii di masti ş-ti nu para au nădii. După primarlu di Custanţa (căsăbă dit apirita a văsiliil’ei), Radu Mazăre, a curi, maca ş-ari ş-mirakea ti samba, idyiul jurnal lu spuni cu numa “del Rio”, işi tu videală şi un “gioni di Dorohoi” (căsăbic dit nord-estu), cum lu dimăndă prezidentul di tin’ie a PSD, Ion Iliescu, ma nu l’i spusi ş-numa. Ama ti cari alţă gion’i pesedişti dit Dorohoi spun tu presă că “easti niheamă suspendat dit partid şi niheamă agudit cu lăpuda”.

Textul: Bogdan Matei
Apriduţearea: Taşcu Lala