| Diplomația a ligâturlor româno amiricani |
| (2007-06-14) |
| Atea dit soni aspuneari: 2007-06-14 15:06 EET |
Numâsitu tora ayonia ministru ti politica cu xeanili ali Românie, Adrian Cioroianu s-adună, Washington, cu secretarlu di stat Condoleeza Rice. Tu un interviu datu a corespondentului a nostru, Cioroianu zburâ ti concluziili a discuțiilor:
Cândâsearea a noastrâ easti câ parteneriatlu strateghic cu SUA prindi s-armânâ pisti politicâ. Aestâ va s-dzâcâ câ, dinclo di iți s-fați tu politica a noastrâ internâ, SUA prindi s-hibâ cândâsiti cã România easti ti daima unu soțu ș-unu oaspi pi cari potu s-aibâ pisti.
Doili zburârâ ș-ti yinitoarli bazi amiricani tu Romanie ș-ti organizarea a summitlui NATO di anlu ți yini, apânghisitu di Bucuresti, și la cari easti posibil s-participâ prezidentul George W. Bush.
Un altu subiectu sensibil: scutlu antirachetâ cari va s-hibâ bâgatu tu Europa di Estu. Volea a Bucureștiului easti ca discuțiili cu Rusia pi aestâ temâ s-hibâ transparenti, directi, ama și serti și sâ si agiungâ pi cât posibil la unâ singurâ boați boațea NATO.
Ta s- demonstreazâ deadunu ali Moscovâ câ bâgarea a scutlui tu Polonia ș- Cehia, cum și bazili militari amiricani dit România ș-Vâryâria au tu scupo maș alumta antiteroristâ ș-nu reprezintâ unâ fuvirseari ti Rusia.
Situația dit provincia sârbeascâ Kosova, iu nai ma multâli bânâtori suntu arbineși, fu ș-ea abordatâ. Frixea a Bucureștiului easti câ soluția tu cazlu Kosovo s-nu aducâ un precedentu cu piricliu ti alti zoni dit Europa.
Cioroianu luyurseaști câ anamisa di pozițiili ali Românie ș-ali SUA nu ari mări diafurali, câțe ș-unu ș-alantu suntu sinfuni câ soluția lipseaști s-ducâ pacificari și nu la ayuniusearea icâ aprindearea diznou unu conflictu.
Tu ațea ți mutreaști Transnistriei (reghiuni separatistâ rusofonâ dit Rip.Moldova, majoritar românofonâ), Bucurestiul și Washingtonul au unâ poziție comunâ sâ spunâ sertu ali Rusie câ ari borgea ș-li tiniseascâ angajamenteli pi cari ș-li lo dinintea ali comunitati internaționalâ, prota ș-prota ritrâdzearea ali ascheri aruseascâ dit Transnistria și dit Georgia.
Romania easti interesatâ di soluționarea aiștui conflictu, cu ahântu ma multu cu câtu staționarea ali ascheri aruseascâ s-feați fârâ acordul ''statlui nicuchiru,'' Ripublica Moldova viținâ, di a curi traseu european Bucureștiul easti directu interesatu.
Autor: Andreea Bojoi
Armânipsearea: Irina Paris
|
2025-04-03
Print
Puteț s-avdzâț căndțido