 Banca Naţională ali Românie lu scâdzu toclu di politică monetară di la 7,5 la 7% pi an da s-da silâ a proţeslui di creditari ali icunumie şi apufusi s-li tânâ ân loc ratili a stogurlor minimi obligatorii aplicabili a pasivilor tu lei, la 15%, şi tu valută, la 25%. Analiştil’i luyursescu câ di itia a aiştei misurâ bănchili comerciali s-poati s-lu ascadâ toclu la creditili tu lei şi luyursescu deţizia a Bancăl’ei chentralâ oportună avânda tu videari presiunili di aprecieri a leului şi evoluţia ali inflaţie tu chirolu dit soni. Analistul icunomic Ionuţ Dumitru:
“Deţizia a BNR easti justificată di trendul di scădeari ali inflaţie. Va s-avem unâ inflaţie pi scâdeari tu chirolu ţi yini, noi luyursim iu câtâ 3,5% tu işita a anlui, şi deftura, un sentimentu ma bun andicra di România. Lucrul aestu s-vidzu tu aprecierea a cursului di alâxeari, s-vidzu că ari criscutâ perspectiva di rating di vâsilie di partea Fitch. Ca impactu pi pâzari, vahi vqa s-videm tu chirolu ţi yini un trenu di scădeari a tocurlor cari va s-ânvârtuşeazâ şi va s-videm tocuri ma n’iţ em la crediti, em la depoziti”. Experţâl’i pistipsescu ama câ bănchili comerciali va li ascadâ tocurli reali la crediti cându incertitudinili di pi pâzarera a lucrului va s-chearâ.
Analistul Radu Crăciun: “Pi chiro şcurtu nu va sâ s-facâ ţiva spectaculos, politica di creditari a bănchilor va s-hibâ influenţată ma multu pi chiro di mesi.Ta s-agiungâ n’iţ tocurli la crediti, sigura easti ananghi şi di unâ ahtari deţizii a BNR, ama pi ningă aestâ easti ananghi şi di criştearea a orixil’ei di creditari di partea a sistemlui bancar. Aestâ orixi, tora di oarâ, easti limitatâ di itia a incertitudinilor ligati di pâzarea a lucrului, şi minduiescu aoa prota ş-prota la criştearea a şomajlui, şi a incertitudinilor pi nivel icunomic, avânda tu videari că un şomaj pi crişteari va s-ascadâ şi orixea di hârgiuiari a român’ilor”.
Pi di altâ parti, premierlu Emil Boc deadi hâbari că Guvernul nu mata aproachi nipâltearea a obligaţiilor financiari cătâ stat şi ari declaratâ polim acutotalui contra ali evaziunii fiscalâ:“Am câftatâ implicari totală şi tin’isearea a nomlui tu aţea ţi mutreaşti evaziunea fiscală, nipâltearea a txilor la sta, polim total cu sarţin’i şi obligaţii directi ti tuti structurli sa Ministerlui a Finanţilor cari au competenţi tu dumeni. Nâinti s-nâ minduim la alti taxi icâ impoziti tu Românie, pistipsescu câ avem obligaţia s-adunăm corectu pâradzl’i di la tută lumea. Nomlu prindi s-hibâ nom, prindi s-aibâ ca unic indicator pâltearea a obligaţiilor, sigura, tu condiţiili a statlui di dreptu”.
Autor: Daniela Stefanescu
Apriduţearea: Irina Paris
|
2025-04-06
Print
Puteţ s-avdzâţ căndţido