El dzâsi câ easti importantă ligarea a infrastructurlor dauiălor vâsili tu dumenea energheticâ şi aţea feroviară, cum şi aţeali ti purtarea di gaze. Traian Băsescu deadi trâ şteari unâ ândrupari financiarâ sânâtoasă ti Moldova. : “România apufusi s-da un agiutor financiar ţi nu s-toarnâ ti Ripublica Moldova, tu un chiro di patru an’i - 2010-2013 inclusiv – ţi faţi 100 di miliun’i di euro, pâradz ţi pot s-hibâ daţ tu patru tranşi anuali – dimi cafi an câti 25 di miliun’i di euro – ti proiectili di infrastructură tu educaţie, moderrnizarea a şcol’ilor şi a proiectielor di infrastructură di importanţă locală, pi nivel di administraţie locală”.

Prezidentul român dzâsi ş-câ Bucureştiul va s-adarâ unâ agenţie ti lişurarea a procedurlor di dari ali cetăţenie românâ ti moldoven’i. Prezidentul interimar di Chişinău, Mihai Ghimpu, adusi aminti că protili misuri a nauâl’ei puteari furâ scutearea di pi lucru a reghimului di vizi ti român’i, bâgat di comuniştii şi siemnarea a Tratatlui cu România ti n’ica urdinari la sinur. Nu mata ari cheadiţ pi calea aduţearil’ei a ligâturlor bilaterali la normalitatea câftatâ arădăţin’ili comuni, pistipseaşti Mihai Ghimpu:

“Mini pistipsescu câ ază nu ari motivi ca putearea di Bucureşti şi putearea di Chişinău s- nu poată s-li ândreagă problemili cari existeadză anamisa di Ripublica Moldova şi România. Him dauă stati, ama unâ cultură,unâ entitate, unâ limbă”. Mihai Ghimpu câftă ândruparea a autorităţlor di Bucureşti ti cetăţen’il’i moldoven’i cari lucrează tu Românie şi l’i acl’imă pi investitorl’i român’i s-facâ emburlâchi cu Ripublica Moldova.

Autor: Ştefan Stoica
Apriduţearea: Irina Paris