Nica nu lo unâ apofasi aţel di ma ninti premier şi lider maxim a PSD, Adrian Năstase. Tâburli nu suntu limbidz, dinâpoia a sţenăl’ei tuit s-fac pâzârâpseri, şi easti zori s-hibâ dat un pronostic. Yinitorlu congres va sâ s-ţ`nâ tu 20 di şcurtu şi va u limbidzascâ catandisea a partidlui, câţe atunţea va s-hibâ votati programlu şi cumândusearea. Social-democraţl’i prindi s-tânâ cheptu giuneaşti pânâ atunţea la iţi tentativâ di destabilizari a partidlui, feaţi timbihi Mircea Geoana. Tu PDL, formaţiunea di guvernămintu cari lu ândrupă aţel di ma ninti şef a statlui, nu ari âncâceri şi tăburi, da asiguripseri democrat – liberal’i. Ari, ama, idei nali şi interesanti, adusi di noil’i membri Cristian Preda, profesor di politologhiei şi europarlamentar şi ministrul di ma ninti ali justiţie, Monica Macovei.

Cei doi recomandâ limbidzarea a doctrinâljei PDL, alâxearea ali politicâ di promovari a membrilor, pi criterii di competenţâ şi nu clientelari, cum şi unâ ma bunâ ligâturâ cu societatea civilă. Sâ zbureaşti inclusiv ş-ti triţearea la titulatura di Partid Popular, uidisit cu familia politicâ europeanâ dit cari PDL faţi parti. Discuţiili pi aesti temi furâ ânchisiti cu curaiu di Cristian Preda şi un coleg, jurnalistul Sever Voinescu. El’i li criticâ mintâturli doctrinari dit PDL şi turlia cum suntu promovaţ membril’i di partid. PNL( di opoziţtie) lo apofasea s-tânâ un congres extraordinar tu meslu marţu, ma ayon’ia di cât s-aştipta.

Liderlu liberal Crin Antonescu spuni că partidlu ari ananghie di unâ discuţie tu cari s-hibâ apufusitâ yinitoarea linie politicâ, după ţi candidatlu ţi lu-ari ândrupatâ tu doilu tur a prezidenţialilor, social-democratll Mircea Geoana, u chiru antriţearea, iara PNL lo apofasea s- nu intrâ la guvernari cu PDL-lu. Al Antonescu âl’i şi bâgă stepsu, afirit, tu partid, deţizia s-lu alasâ PNL tu opoziţie. Mutarea cama ninti a datâl’ei a congreslui ari tu scupo vahi s-nu-l’i alasâ pi eventual’i contestatari ş-u ândreagâ opoziţia.

Autor: Ştefan Stoica
Apriduţearea: Irina Paris