| Romania tu UE isapi di etapâ |
| (2007-06-13) |
| Atea dit soni aspuneari: 2007-06-13 13:20 EET |
Aderarea ali Românii la UI tu 1 di yinaru 2007 fu un sucțes multu aștiptat, ti cari Bucureștiul vidzu zori s-aducâ mârtirii a oficialilor di Bruxelles câ li umplu condițiili ananghi ti integrari. Prezidentul ali Comisii Europeanâ, Josi Manuel Barroso declară, marțâ, dupâ unâ întrivideari cu premierlu Călin Popescu Tăriceanu, vinit Bruxelles s- prezintâ catandisea a angajamentilor loati, câ dețizia mutrinda apruchearea ali României s-ali Vâryârii tu Uniunii fu corectâ. Tu 27 di cirișar, Comisia va s-prezintâ ântânilu raportu mutrinda progresili a Bucureștiului dupâ aderari, cum și ațeali ți nu s-feațirâ tu dumeni cliai cum justiție, agriculturâ, alumta contra ali arușfeti. Barroso prețiză câ raportul va s-hibâ unu obiectiv și pi ndriptati. Elu sumcundilii câ informațiili tipusiti tu presâ ti unâ posibilâ activari a clauzilor di salvgardari suntu maș speculații, câțe Comisia nu ari loatâ niți unâ dețizie. Barroso adusi aminti câ problemili reali ali Românie suntu tora duțearea ninti a reformilor, alumta contra ali arușfeti și existența unui sistem judiciar corectu chestiuni luyursiti Bruxelles câ suntu di mari simasie ti stabilitatea politicâ ali Românie ș-ti investițiili xeani. Easti ananghi di credibilitati dzâsi prezidentul ali Comisie Europeanâ - tu plan internu, prit duțearea ninti a reformilor tu justiție și tu alumta contra a arușfetilei, și tu plan externu, anamisa di alanțâ membri ali Uniuni, ta s-facâ mărtirie câ România țâni di aestu club a curi valori siguri suntu democrația și statlu di dreptu. Premierlu Tăriceanu deadi asiguripseri câ autoritățli di București va s-ducâ ninti misurli di reformâ tu aesti dumeni, inclusiv tu ațea ți mutreaști absorbția a fondurlor comunitari. Tu întrividearea avutâ cu prezidentul a Leghislativlui European, Hans-Gert Pottering, șeflu a executivlui di București și spusi pârearea di arău câ ncâcerli politiți interni dit chirolu dit soni u mintirâ percepția externâ ali Românie.
Tăriceanu dzâsi ama câ stepsurli bâgati tora ayonia di dânâseari a reformilor ș- di crișteari ali arușfeti sunt contrazisi di factul câ procurorli au dusâ ninti cercetărli tu cazlu a unui prim-ministru di ma ninti și a unui membru a guvernului di tora.
Pi di altâ parti, Tăriceanu dzâsi diznou că România easti unâ di vâsiliili cari voru ca reformili ananghi ti unâ ma bunâ funcționari a UE, sâ s-ducâ deadunu cu misuri ți au tu scupo s-u creascâ integrarea politicâ și icunomicâ ali vâsilie. Elu adâvgă câ prințipalu obiectiv easti s-adarâ unâ Uniuni cari s-hibâ ancoratâ tu realitati, tu problemili și minduierli a cetățeniloru, cu instituții sânâtoasi, axi s-tânâ cheptu la provocărli di azâ.
Autor: Leyla Keamil
Armânipsearea: Irina Paris
|
2025-04-03
Print
Puteț s-avdzâț căndțido