Emil Boc declară că actualu buget di stat easti unu cari marchează işearea dtn criză ali României şi di altâ parti, actualu buget cari, dzâc el’i, li faţi iara alatusili di an, easti un buget anti-social şi nu prezintă soluţii di ieşeari dit criza icunomică. Prezidentul a PSD şi a Senatlui, Mircea Geoană, dzâsi că tu bugetlu pi 2010 nu ari elementi cari s-garanteazâ unâ crişteari icunomică ali vâsilie. După părearea a social-democratlui, bugetlu va s-aibâ alâxeri substanţiali anlu aestu căţe parametril’i icunomiţ nu va s-hibâ aţel’i ţi-l’i minduiaşti Guvernul actual. Tru aradha a lui, prim-viceprezidentul PNL, Ludovic Orban, declară că easti nai ma slablu buget dit aeşti 20 an’i dit soni.

El dzâsi a aestu nu ari niţi unâ turlie di misurâ cari s-aducâ investiţii şi s-adară nali locuri di lucru, condamnă dzâţ di n’il’i di firmi la falimentu cum şi multi categorii sociali dit arada a bugetarilor la scâdearea a nivelui di bană. Adoptarea a bugetlui pi 2010 eara unâ condiţie a FMI ca România s-l’ia yinitoarili dauă tranşi dit împrumutlu di aproapea 13 di miliardi di euro contractat cu instituţia financiară internaţională. Aestu easti parti a unui împrumut di vârâ 20 miliardi di euro amintat di Romania di la Fondu, Comisia Europeană, Banca Mondială şi alti organismi financiari internaţionali.

Ministrul a finanţilor, Sebastian Vlădescu, deadi hâbari că România va s-aproachi, tu niheamâ chiro, treia tranşă di pâradz di la Fondul Monetar Internaţional, di vârâ 1,5 miliardi di euro, căţe Bucureştiul ş-li ari tin’isită angajamentili. Pi di altă parti, şeflu a Biroului FMI ti Romania şi Vâryâria, Tonny Lybek, deadi hâbari că misiunea a Fondului va s-yină Bucureşti tu dzâlili di 20 - 27 di yinar ta s-azburascâ cu reprezentanţâl’i a Ministerlui di Finanţi şi a Bancăl’ei Naţională.

Autor: Daniela Ştefănescu
Apriduţearea: Irina Paris