Tutnâoarâ, cându u lo aestâ deţizie BNR lo tu isapi perspectiva adoptaril’ei a proiectului di buget ali României ti 2010 , condiţie sine qua non ti transili 3 si 4 dit âmprumutlu contractat di la FMI. Teoretic, prit scâdearea a toclui di politicâ monetarâ, bănchili cu capital privat pot sâ s-âmprumutâ cama ieftin di la BNR şi pot s-bagâ tocuri ma n’iţ la depoziti şi la crediti. Tu prota şedinţâ di politicâ monetarâ dit 2010, guvernatorlu a BNR, Mugur Isărescu, luyursea ama, câ tocurli mări pi pâzarea interbancarâ armân idyili şi câ ti aestu fenomen stipseaşti işişi statlu român cari si âmprumutâ masiv di la instituţiili bancari ta s-pâlteascâ pensiili şi tin’iili di cafi mes a bugetarlor.

“Ananghea substanţialâ di finanţari a xichil’ei bugetarâ dit partea dit soni a anlui 2009, cându, di iitia ali instabilitati politicâ, România nu a putu s-aibâ hâiri di la pâradzl’i di la FMI, adutţi unâ disuiduseari anamisa di ratili a tocurlor interbancari şi rata a toclui di politicâ monetarâ” spuni guvenatorlu. Anlu tsi tricu, statlu român ari âmprumutatâ di la bănchi 15 miliardi di euro. Avanda câftări masivi, cari li asiguripsescu amiontatiţi mări, bănchili nu suntu interesati s-ascadâ tocurli. Borgili di primansus a mushtiradzlor, criscuti ş-di itia câ scâdzu pârălu national, bagâ unâ furtie greauâ pi âmprumuturli şi depozitili a cetăţen’ilor, nivelul a lor di banâ şi calitatea nâscântor servicii “low budget” dati di stat.

Ti exemplu, ânvitâmintul românescu easti obligat, anlu aestu, s-avinâ di la lucru 15.000 di inşii, pensiili va s-armânâ idyili,sânâtatea easti şi va s-armânâ ea işişi lândzidâ. Un ghestu aproapea dipirat lu reprezintâ proiectul bâgaril’ei, di ministrul a sânâtatil’ei, Attila Cseke, a unâljei taxâ pi pârmâtiili alimentari di turlia fast-food, cari ş-u aduţi cu “taxa pi tabaieţli lăi”, ti finanţarea, tu chiro di crizâ, a sistemlui sanitar. Taxa lipseaşti s-aducâ la bugetlul di stat un miliardu di euro cafi an. Âncurajaţ di aestâ iniţtiativâa, nutriţioniştil’i advgarâ ş-câ, tu Romanie, iu un di patru inşii east lândzid di obezitati, lipseaşti s-hibâ bâgatâ şi unâ taxâ pi... zverca di porcu.

Autor: Valentin Ţigău
Apriduţearea: Irina Paris