Certitudin’ili goali dit ahurhita di an suntu, toradioara, scunchirli, ţi viniră, tu ma marea parti di furn’ia, a criştearil’ei obligatorie a accizilor. Român’il’i nica va s-păltească ma multu ti carburanţă, cari s-vindu tora, tu medie, cu 4,2 lei – aproapea un euro – kilolu. Ti şoferi nu easti goala hăbari arauă slabă, căţe fu majorată şi asiguripsearea obligatorie ti autovehicule. Aţel’i ţi bea tătumea ved zorea tora ta s-minduească ma multu ti ună eventuală trădzeari mănă di la aestu fărmac, căţe pacheta di ţigări agiumsi s-custusească aproapea 10 lei, ţi va s-dzăcă 2,5 euro.

Tu cazlu a alimentelor, anularea a sumvenţiilor tu agricultură, criştearea a accizilor şi posibila scădeari a tin’iil’ei la leu – pi cari un scenariu fără di nădii lu-veadi pi nivelu di 4,5 lei ti un euro – va s-ducă la criştearea a păhălui la carni, mezeluri şi lactati cu până la 30%. Producătorl’i dit dumenea alimentară spun, ama, că scunchirli nu va s-hibă duchiti ună ş-ună, că maş tu meşl’i ţi yini. 2010 adusi cabaia crişteri - di 20% - tu cazlu a taxilor şi a impozitilor, după ţi guvernanţăl’ii apufusiră că nivelu a aiştor lipseaşti s-hibă actualizat andicra di inflaţie.

Cum tu treil’i an’i taxili şi impozitele fură tu idyea scară, vas-hibă ananghi, tora, di criştearea a aiştor. Va să scunchească şi electriţitatea, ama proţentul nu easti, nica, apufusit. Ma s-aibă, ama şi hăbări buni, eali yin maş ti amatorl’ii di produsi di lux, căţe aesti nu va s-hibă băgati cu accizili. Pensionarl’ii, al’iumtrea, au căţe să s-aspară, căţe sirţăl’a bugetară va lă zn’iipsească direct. Executivlu apufusi, tu bitisita al 2009, s-amână băgarea a pensiilor ti agricultori şi s-li ngl’aţă pensiili tu aestu an. Practic, punctul di pensie nu va s-crească la 45% dit tin’ia di cafi mes brută până tu 2011.

Fură desfiinţati, tutunăoară, agiutoarili tu alimenti ţi s-da a pensionailor oarfăn’i. Bugetarl’ii şed, tu arada a lor, sum fuvirsearea a niscăntor apofasi serti, băgati di furn’ia a amintatiţlor limitati a statlui şi di n’icşurarea a sistemlui public, unăoară cu băgarea tu lucru a nomlui unitar a tin’iilor di cafi mes. Aşi cum spun, 15 di n’il’i di lucrători dit Educaţie va s-hibă concediaţ, iara tichetili di measă şi di vacanţă ti bugetari va s-hibă scoasi. După un an – 2009 – tu cari fură greali antriţeri ampuliseri electorali, ţi avu tu amprotusa politica şi sterilu tu aţea ţi mutreaşti politiţli, 2010 aduţi, barim, tăxearea ti turnarea la isihie şi ahurhearea a lucurlui diznău ti reformi.

Textul: Ştefan Stoica
Apridutearea: Taşcu Lala