Şi pensionarl’ii va u dukească sirţăl’ia tru 2010, căte pensiile va s-hibă ngl’iţati pi nivelu dit sumedru 2009. Tuti aesti hăbări slabi, şi cari ti amărtie nu suntu maş eali goali, suntu acătati tu programlu di guvernari, parti dit aesti hiindalui adus aminti tu chirolu a audierlor ti năulu executiv. Meatrili ţi s-vedu tu documentu au tu videală corectarea a raportului anamisa di hărgili curenti şi ateali di investiţii, tu condiţiili tu cari politica bugetară ti anlu 2010 mutreaşti ună ixichi bugetară di 5,9% dit produslu internu brut, simfun cu ateali achicăsiti cu instituţiili financiari internaţionali cu cari România simnă ună achicăseari stand-by ti aproapea 20 miliardi di euro.

Di aoa apofasea a guvernanţălor ti raţionalizarea structur instituţională a sectorlui public, ta s-anvărtuseadză reformili structurali tu dumenea a pensiilor prit lărdzearea a bazăl’ei di contribuţie, ama şi di acăţari ună cali ti ma bun tră programili di asistenţă suţială şi ta s-ndreagă ună politică a tin’iilor di cafi mes cu ngătan tu sectorlu bugetar. Ună altă prioritati u reprezintă promovarea a nomlui ti responsabilitatea fiscală şi a nomlui mutrindalui reforma a sistemlui di pensii. Ună aradză di nădie aduţi Comisia Naţională di Prognoză cari luiyurseaşti că, anlu ţi yini, economia poati ta s-crească cu cama di 1,3%. Motorlu cari va u ndreagă catandisea easte industria. Ma multu, România poati s-bitisească anlu 2009 cu ună scădeari economică ma n’ică di 7%, acă s-pistipsea că aestă va s-hibă di aproapea 8%.

“Năulu buget ali Românie bagă thimeal’ili a regimlui cu numa “Armăni tu bană cari poati” ngrăpseaşti COTIDIANUL. Jurnalu anyrăpseaşti că “mintătura ţi u adrară guvernanţăl’i a noştri prit aţea cănu furăstreşi cu părălu dit instituţiili di stat va s-hibă ndreaptă anlu ţi yini pi schinăratlu a lucrătorlor di arada şi prit curbani ţi va u treacă pensionarl’i şi elevl’i”, cari numata va s-hărsească di transportul fără s-poăltească. “Pensiili şi tin’iili di cafi mes numata va s-crească tu 2010”, spuni şi ROMÂNIA LIBERĂ. Jurnalul aleadzi dit spusili a prezidentului ali federaţiil’ei sindicali “Cartel Alfa”, Bogdan Hossu, ţi spuni că “eventuallili concedieri va s-facă prit reorganizarea a niscăntor instituţii”. ZIARUL FINANCIAR tipuseaşti un interviu cu caplu ali Comisie Naţională di Prognoză, Ion Ghizdeanu, cari, maca feaţi unăisapi a indicatorlor economiţ, agiundzi pi isapea că “him pi calea redresari, ama va s-cristem preayalea ayalea”.

Textul:Corina Cristea
Apriduţearea: Taşcu Lala