Cufămili di la cama di 40 di inşi fură dusi tu capitală şi arsi, cu scupolu tra s-aşteargă iţi tor iţi spuneari. Ti memoria a martirilor di Timişoara, ca tu cafi an, şi tora s-ţănu, tu aesti dzăli, conferinţi şi liturghiseri relighioasi speţiali, dzuua di 17 di andreu hiindalui, tru idyiul chiro, dzuuă di jali. Suti di inşi s-adunară tru Piaţa Maria, loclu iu tru 1989 s-gri ti prota oară “Mpadi comunismul", şi adrară diznău ună recnstituiri cu nchisita ali Revoluţie – dinintea a casăl’ei a pastorlui reformat László Tokés, aclo iu protestul a embistimen’ilor niifharistusiţ di apofasea a evacuaril’ei a preftului a lor s-alăxi tu ună revoluţie anticomunistă.

Di tu arada a participanţălor avea mulţă revoluţionari cari pirmitusiră traghedia cari vini ma amănat (track voce 1) “Ună aiami nă pimsiră pisti apunti şi ti un stic di oară s-aminară tufechi. Dimi nu s-amină ndreptu tu noi, s-amină pi geadei şi cându s-aminară tufechi ansăriră cătă noi ricoşeuri şi atumţea fu protlu insu tufichisitu tu cicior. Grim cătă alanţă:"S-amină! Tută dun’aua mpadi ! Tută lumea pi dinţă pi păntică !". Şi diti aţel stic di oară s-amină, şi s-amină tu noi vărtos”. (track voce 2): “Vidzui şi tu mirminţă, ama şi pi geadei oamin’i cari fură tufichisiţ ş-ţi deapoa eara duşi niscănţă la spital şi di aclo chirură, a deapoa alţă eara duşii ndreptu la mirminţă”.

Ndauă dzăli ma amănat, Bucureşti, cu păhălu a banăl’ei a lor, revoluţia anticomunistă agiundzea pi scupolu pripus, dictatorlu Nicolae Ceauşescu şi nicuchira a lui, Elena, hiindalui acăţaţ tu chirolu anda minduia tra s-fugă şi, după un proţes ntrăoară executaţ vătămaţ. Isapea a morţălor -1104 di morţ şi 3552 pliguiţ. Umplearea a 20 an’i di la revoluţia română fu adusă aminti şi la Parlamentul European. Prezidentul Jerzy Buzek (track): “Easti remarcabilă pirmitusearea ali Românie di aoa şi 20 an’i, easti ahăt urută. Bitisita a l’ei, easti, ia-u-ia, ama hărăcoapă”. Călisitu di tin’ie ali manifestari, preftul Laszlo Tokes, ază membru a Parlamentului European, năpoi adusi aminti că victoria-a român’ilor avu la thimel’iu pistea. Laszlo Tokes (track): “Mântuirea/Vindicarea easti tu pisti”.

Textul: Corina Cristea
Apriduţearea: Taşcu Lala