Fu ama ananghi, ca, luni seara, cându vidzu că şi riexaminarea şi rimisurarea a voturilor nuli confirmă avansul al Băsescu, Curtea Constituţională s-da nanaparti tuti contestaţiili ali opoziţie social-democratâ şi s-valideazâ rezultatlu a defturlui tur di scrutin, di pi 6 di andreu. Cu maş 70 di n’il’i mii di buletini di vot ma multu, Băsescu amintă 50,33% dit sufragii, iara contracandidatlu a lui, liderlu PSD, Mircea Geoană, ândrupat di întreaga opoziţie şi di un formidabil cartel mediatico-financiar, maş 49,67%.

Vizibil ânvirinat, diparti di jubilaţia pi cât di frenetică, pe-ahântu di prematură dit seara a alidzerilor, cându majoritatea exit-pollurilor lu spunea amintâtor, Geoană, şi-pricunuscu, pânâ tu soni, azvindzearea:“Ca ţităţean ali Românie democratâ u aprochi deţizia a Curtil’ei şi âl’i or sucţes a domnului Traian Băsescu tu noulu mandat. Am nâdia câ aestu nou mandat a domnului Băsescu va s-hibâ exercitat cu ma multu echilibru, cu ma puţâni excesi şi ti intereslu a tutulor cetăţen’ilor ali Românie.”

Geoană nu agârşi ama s-bagâ stepsu ali Curti că nu ari loatâ tu isapi tuti documentili ti cari PSD dzâţi câ scot tu padi furlâchea di la scrutin. Ma multu, s-pizuiaşti presa, el nica “s-ânyiseazâ prezidentu Veneţia şi Strasbourg”, şi fuvirseaşti că “easti etim s-neagâ aclo şi să s-plângă că prezidenţia âl’i fu furată.” Juriştil’i sumcundil’iadzâ, ama, că, niţi Comisia di Veneţia, niţi Curtea Europeană a Ăndrepturlor a Omului “nu lucreadzâ cu plândzeri electorali”. Iara analiştil’i politiţ spun că persevereţa a lui ari tu scupo nu prezidenţia ali Românie, câ şefia a PSD, âl’i si ândreadzi debarcarea.

Tu PDL (la guvernari, pro-prezidential) easti, di altâ parti, isihie. Cu nai ma marli numir di parlamentari şi cu liderul de facto riinstalat la Prezidenţie, partidlul si luyurseaşti câ ari ândreptu s-hibâ prota avyiulie tu iţi formulâ executivâ. Viceprezidentul PDL, Gheorghe Flutur: “Tu aestu momentu, pistipsescu că şi criza politică dit România provocată di PSD, prota ş-prota, s-bitisi. Intrăm tu linie dreaptă ti jgl’ioatili yinitoari mutrinda formarea a unui guvernu şi dizvârtearea a programilor di cari au ananghi român’il’i.” Abonată, cu pauzi nisemnificativi, la coaliţiili guvernamentali a aiştor dit soni ultimilor 13 di an’i, di îti buiauă eara eali, UDMR fu, diznou, prota hâzâri la unâ asocieri cu PDL.

Prezidentul ali Uniuni, Markó Béla: “Noi va s-duţem ninti discuţiili cu colegan’il’i a noştri dit Partidul Democrat-Liberal, lipseaşti s-videm tora ţi va s-adarâ aţel’i dit PNL, noi nica optăm ti prezenţa a lor tu ună ahtari coaliţie majoritară.” Tora di oară, ama, PNL condiţionează intrarea la guvernari di numâsearea a unui premier liberal icâ a unui independentu. Aţea ţi, ti presă, u spuni disponibilitatea a şefan’ilor liberal’i maş ti “pâzârâpseri di figuraţie”, cari pot s-aducâ maş armânearea a partidlui tu opoziţie. Dimi, tamam ca tu campania electorală, umir la umir cu PSD-ulu.

Autor: Bogdan Matei
Apriduţearea: Irina Paris