Yinearea a aţilor di la FMI easti luyursitâ unâ surpriză, câţe aeşti eara aştiptaţ Bucureşti tu prota parti a anlui ţi yini, după formarea a noului Executiv. Pi ninga aestâ, meslu ţi tricu, em FMI, em Comisia Europeană avea dată hâbari câ nu mata va s-sâlâgheascâ nali tranşi dit âmprumutlu externu apufusit tu primveară, di itia ali instabilitati politicâ şi a xichil’ei a bugetlui pi 2010.

Ministrul interimar di finanţi, Gheorghei Pogea, ari declarată că proiectul a bugetlui easti finalizat tu proporţie di 95% şi deadi asiguripseri că principal’ii parametri armân aţel’i apufusiţ cu FMI şi UE: ună xichi bugetară di 5,9% dit Productul Internu Brut şi ună crişteari icunomicâ di 0,5%. Unâ nauă dzâţi Pogea easti aţea că investiţiili publiţi va s-aibă ună ponderi ma mari tu buget, respectiv 7% dit PIB. Pâradzl’i va s-hibă daţ ti infrastructură, mediu, educaţie şi dezvoltari reghională ta s-bagă pi lucru aclo cât ma multi di persoanili armasi fârâ un loc di lucru.

Cifrili oficiali spun câ tu meslu brumar, rata a şomajlui tun România agiunsi la 7,5%, nai ma analtul nivel dit aeşti dit soni 5 an’i şi 8 meşi şi va s-creascâ nica tu prota parti a anlui 2010. Şi rata ali inflaţie criscu, tu brumar ti prota oară după 8 meşi consecutivi di ascâdeari, di la 4,3 la 4,6%. Tora ayon’ia, Lybek declara că un buget credibil pi 2010 lipseaşti s-tin’isească xichea ti cari s-acâchisirâ, câţe aestâ nu poati s-hibâ pâzârâpsitâ diznou, luânda tu isapi câ ea fu alâxitâ unâ oară ti estan di la 4,6% la 7,3% dit PIB, di itia a alâxearil’ei a cadrului macroicunomic.

Tutnâoarâ, ascâdearea a hărgilor bugetari, prindi s-hibâ realistâ, iara amintatiţli s-intră la buget, uidusit cu prognoza icunomică. Analiştil’i icunomiţ pistipsescu că discuţiili nai ma serioasi va s-mutrească majorarea ică nu a taxilor. Aduţem aminti că România ari adratâ unâ acâchiseari di finanţari cu FMI şi alti organismi internaţionali di 19,95 miliardi euro, di cari lo pânâ tora dauă tranşi, di aproapea 7 miliarde di Euro.

Autor: Andreea Bojoi
Apriduţearea: Irina Paris