|
|
| Ţi au amintată fermierl’i? |
| (2009-10-29) |
| Atea dit soni aspuneari: 2009-10-29 12:58 EET |
Ma multi suti di criscători di tutipoută român’i au protestată cu halat, n’iercuri Bucureşti, dinitea a Ministerlui ali Agricultură, a Guvernului şi dapoia ali Prezidenţie, nivrisiţ că statlu nu li-ari pâltită sumvenţiili tăxiti. Fermierl’i dzâcu că amânarea a pâlterlor va s-ducă la falimentarea aiştui sector. Tu ună protă hopă pâzârâpserli a protestarilor cu miniştril’i interimari di finanţi, Gheorghe Pogea, respectiv agricultură, Radu Berceanu, nu avură cană hâiri câţe pripunerea di eşalonari a pâlterlor nu fu aprucheată di fermieri. Discuţiili ţi s-feaţiră dapoia cu şeful a statlui, Traian Băsescu, aduşiră ţiva rezultati. Prezidentul lâ dzâsi a fermierlor că tora nu ari pâradz la buget ti pâltearea integrală a sumvenţiilor şi că aestă nu poati să s-facă dit fonduri europeani. Maşi ună parti di acesti sumventii potu s-hibă datui tu prota giumitati a meslui brumar ş-ti alantă parti guvernul lipseaşti s-află ună soluţie pân di işita a anlui. Traian Basescu: ''Daima, sumvenţiili, şi tu 2007 şi tu 2008, fură dati tu dauă tranşi. Dimi, tut tu dauă tranşi va s-pâltească şi tora. Easti un an special, câţe laptili şi carnea avură pâhadz multu n’iţ. Şi ti aţea prindi s-videm maca lipseaşti s-u mărim niheamă prota tranşă''. Tu aestu chiro, guvernul interimar PDL (pro-prezidential) u aprobă darea ună sumvenţie di 44 di lei ti cafi ună oaie ică capră, din cari ună protă parti, di 15 di lei va s-hibă păltită ahurhinda cu 2 di brumar. La idyea dată va s-agiungă tu conturili a criscătorlor di bovini ună protă tranşă, di 200 di lei, dit sumventia di 571 di lei pruvidzută ti cafi pravdă. Câţe nu au pisti pi spusili a autorităţlor, criscătorl’i di tutipută feaţiră timbihi că va s-iasă pi sucăchi cafi n’iercuri, până cându va s-l’ia pâradzl’i. Ună hâbari bună vini di Bruxelles: Comisia Europeană deadi izini a statilor membri s-da, temporar, a fermierlor agiutoari di pînă la 15.000 di euro. Suma poati s-=hibă dată maş ună oară ti cafi unu fermier, pân di işita a anlui 2010. Deţizia, cari faţi parti dit ună pachetă di masuri anticriză, ari tu scupo stabilizarea a amintaticlui a fermierilor di tuti sectoarli, inclusiv aţel a producătorilor di lapti. Bruxelleslu deadi hăbari nica di stâmâna ţi tricu ti unu agiutor finaciar suplimentar di 280 di miliun’i di euro ti producătorl’i di lapti. Comisia Europeană apufusi tindearea a gamăl’ei di prodcti inclusi tu programlu 'Lapti tu şcoli' şi a categoriilor di ilichie cari va s-intră tu aestu program.
Autor: Andreea Bojoi
Apriduţearea: Irina Paris
|
|
| |
WMA |
|
64kbps : |
1
2
3
|
|
|
128kbps : |
1
2
3
|
| |
MP3 |
|
|
64kbps : |
1
2
3
|
|
|
128kbps : |
1
2
3
|
| |
AAC+ |
|
|
48kbps : |
1
2
3
|
|
|
64kbps : |
1
2
3
|
 Mascota istorica a
RRI |
2025-04-06
Print
Puteţ s-avdzâţ căndţido